Ministru Obras Públikas, Transporte no komunikasaun sira, Gastão de Sousa, akompaña husi reprezentante Banku Mundiál nian, Balormaa Amgaabazar, no husi Embaixadór Xina nian iha Timor-Leste, hala’o ona inaugurasaun ba estrada ho kilómetru 10, ne’ebé liga Hali-Laran, Munisípiu Dili nian, ba Laulara, Munisípiu Aileu nian, iha serimónia ida ne’ebé hala’o iha loron 26 fulan-agostu iha Palásiu Lahane nia oin, Dili.

Obra ne’e marka etapa dahuluk husi reabilitasaun ba estrada sira ne’ebé liga tasi-feto no tasi-mane, no sei lori benefísiu sira hanesan hamenus tempu viajen nian sira, halo poupansa ba kombustivel, hadi’a komunikasaun iha rai-laran no fó biban serbisu nian ba komunidade sira ne’ebé hela besik iha fatin konstrusaun.

Gastão de Sousa fó hanoin fila-fali katak reabilitasaun ba estrada parte ne’e hahú ona iha loron 8 fulan-agostu tinan 2014 liubá no remata ona iha loron 31 fulan-jullu tinan 2016. Empreza ne’ebé envolve iha obra ne’e maka empreza Xine nian Shun International Economical and Technical Corporation Group Company no iha traballadór timoroan nain 150 ne’ebé laiha kualifikasaun,  hodi hala’o serbisu ne’e. Iha mós estudante universitáriu na’in 16 maka hala’o ona sira-nia estájiu iha konstrusaun ne’e, hodi hetan koñesimentu prátiku kona-ba dezeñu, monitorizasaun, kontrolu ba kualidade, foti dadus no inspesaun loro-loron iha terrenu.

Konstrusaun ne’e halo parte iha konjuntu ida ne’ebé kompostu husi pakote lima. Pakote dahuluk ne’e, husi  Hali-Laran to’o Laulara, finansia husi Banku  Mundiál.  Pakote haat seluk iha hela faze konstrusaun nian, maka estrada husi Laulara to’o Solorema, ho kilómetru 22, husi Solerema to’o Bandudatu, ho kilómetru 29, husi Bandudatu to’o Aitutu, ho kilómetru 25 no Aitutu to’o Ainaru kilómetru 23.

Sira ne’ebé marka prezensa iha Serimónia ne’e maka Ministru Negósius Estranjeirus no Kooperasaun, Hernâni Coelho, Vise-Ministru Obras Públikas, Transporte no Komunikasaun, Januário da Costa Pereira, Sekretáriu Estadu Konsellu Ministrus, Avelino Coelho, Sekretária Estadu Arte no Kultura, Maria Isabel Ximenes, no konvidadu sira seluk.