Empreza nasionál petróleu nian, harii ho Dekretu-Lei n. 31/2011, loron 27 fulan-jullu, no hetan aprovasaun husi Konsellu Ministrus molok fulan rua, to’o oras ne’e nafatin aproveita partisipasaun másimu husi Timor-Leste iha dezenvolvimentu ba ninia setór petrolíferu.
TIMOR GAP, EP marka ninia loron moris nian ho publikasaun edisaun espesiál ida husi ninia “newsletter”, (bele haree iha www.timorgap.com), iha ne’ebé halo rezumu ida husi akontesimentu importante sira iha tinan 5 ne’e nia laran.
Iha tinan 2011, ho de’it funsionáriu na’in 22, TIMOR GAP kria nia subsidiária dahuluk, maka GAP-MHS Aviation Lda., ne’ebé, iha kedas tinan ne’e nia rohan, hahú hala’o ninia servisu hodi fó apoiu iha Área Konjunta Dezenvolvimentu Petrolíferu (AKDP), iha Kitan, iha Tasi Timor nian.
Dezenvolvimentu institusionál, liuhusi rekrutamentu no formasaun, maka prioridade ida entre prioridade sira seluk iha 2012 nian. Polítika empreza nian sira hetan aprovasaun no hahú halo ona supervizaun no administrasaun ba estudu oin-oin kona-ba Projetu Tasi Mane, inklui estudu kona-ba impaktu ambientál ba baze abastesimentu Suai nian, estudu kona-ba impaktu ambientál estratéjiku husi Projetu Refinaria Betanu no estudu detalladu ida kona-ba rota gazodutu iha kampu gás Greater Sunrise nian, husi Tasi Timor ba Beasu.
Hafoin harii liu tiha tinan rua, númeru funsionáriu TIMOR GAP nian sa’e tan ba ema na’in 95. Iha tinan 2013, empreza ne’e partisipa uluk, iha atividade esplorasaun no produsaun nian sira, ho asinatura ba Kontratu Partilla Produsaun nian dahuluk iha ACDP. Komunidade Suai entrega ona rai ektár 1.113 ba Governu, atubele uza ba dezenvolvimentu baze abastesimentu Suai nian.
Iha tinan 2014, hahú modernizasaun ba aeroportu Suai nian, infraestrutura esensiál ida ba dezenvolvimentu iha tasi mane. Kria ona mós subsidiária foun ida, maka Timor Gap Oil and Gas Marine & Logistic Services, ba prestasaun servisu tasik no lojístika nian.
Iha tinan 2015, buat ne’ebé importante maka Rezolusaun Governu nian kona-ba partisipasaun TIMOR GAP, EP nian iha operasaun petrolífera sira iha área eskluziva Timor-Leste nian. Nune’e empreza ne’e hetan autorizasaun atu partisipa iha kontratu sira kona-ba fahe produsaun iha rai-maran (“onshore”) no iha tasi-laran (offshore”) husi Área Eskluziva Timor-Leste nian, ho objetivu atu hamenus risku jeolójiku no atu hadi’a koñesimentu kona-ba potensiál idrokarbonetu ne’ebé mak iha. Asina ona mós kontratu daruak kona-ba esplorasaun hamutuk iha Área Eskluziva Timor-Leste nian. TIMOR GAP Seismic Service, parseira ida entre TIMOR GAP no BGP GeoExplorer – empreza ne’ebé hala’o estudu jeolójiku sira ho sede iha Singapura –, harii iha tinan 2015, hahú, iha fulan-dezembru tinan hanesan, halo levantamentu dadus sísmiku sira ho formato 3D nian iha tasi husi Área Eskluziva Timor-Leste nian.
Iha fulan-abríl tinan 2016, iha loron balu molok tama ba tinan dalimak husi ninia ezisténsia, TIMOR GAP, EP atinje ona marka foun ida, bainhira sai hanesan emprenza Timor nian dahuluk ne’ebé hetan sertifikadu husi Organizasaun Internasionál Normalizasaun – ISO. Dokumentu tolu maka hanesan (9001: 2008, ISO 14001: 2004 no ISO 18001: 2007) sertifika ona internasionalmente jestaun kona-ba kualidade, saúde, seguransa no meiu ambiente empreza ne’e nian. Iha fulan hanesan, atinje ona mós marka seluk tan, ho inaugurasaun ba postu abastesimentu kombustivel TIMOR GAP nian dahuluk, iha Suku Kamenasa, iha tasi mane.
Projetu Tasi Mane tama ona ba-iha faze dezenvolvimentu nian ne’ebé maka’as, ho Konkluzaun ba estudu fábrika Gás Natural Liquefeito, hahú konstrusaun estrada ne’ebé maka liga Suai ba Zumalai no kontinuasaun husi konstrusaun aeroportu Suai nian, ne’ebé maka tenke remata iha tinan 2017.