Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 29 fulan-agostu tinan 2016

Governu aprezenta “Polítika Timor-Leste nian kona-ba ketan tasik sira”

Primeiru-Ministru, Rui Maria de Araújo, ohin aprezenta ona dokumentu “Polítika Timor-Leste nian kona-ba ketan tasik sira”, iha Ministériu Negósius Estranjeirus no Kooperasaun, iha Dili.

Xefe Ezekutivu Timór nian ne’e hateten katak iha dokumentu ne’e “konta istória luta Timor-Leste nian kona-ba direitu soberanu sira ba ami-nia tasi sira – husi tempu ne’ebé liu tiha ona to’o tempu agora, no saida maka direitu hirak ne’e signifika ba loron aban-bainrua nian”.

Dokumentu polítika nian ida ne’e esplika prinsípiu sira kona-ba Direitu Tasi nian no define pozisaun Timor-Leste nian kona-ba  fatin loloos atu hatuur ketan tasik sira, tuir Direitu Internasionál. Dokumentu ne’e mós fó vizaun jerál ida kona-ba Istória Timor-Leste nian, inklui problema hirak ne’ebé envolve ketan tasik sira.

“Polítika Timor-Leste nian kona-ba ketan tasik sira” aprezenta iha loron ne’ebé hanesan iha ne’ebé Negosiadór Prinsipál ba Ketan Tasik, Kay Rala Xanana Gusmão, no Ministru Estadu Prezidénsia Konsellu Ministrus, Agio Pereira, partisipa iha aprezentasaun ida kona-ba kazu ida ne’e iha sesaun nakloke ida husi Komisaun Konsiliasaun Tribunál Internasionál Haia nian, ne’ebé integra iha audiénsia dahuluk ba prosesu konsiliasaun obrigatória kona-ba ketan tasik sira.

Iha Dili, Primeiru-Ministru afirma katak hatuur limite tasi sira nu’udar prioridade ida ba povu no Governu Timor-Leste nian no defende katak “ketan tasik permanente sira sei fó seguransa jurídika ba ami-nia indústria barak, inklui alfándega, seguransa, servisu imigrasaun nian sira, turizmu, peska no rekursu naturál sira. Tatebes (serteza) ida ne’e sei hametin konfiansa no sei insentiva empreza sira no investimentu, ne’ebé ikusmai sei loke serbisu barak. Ida ne’e, sei hasa’e ekonomia  no sei kontribui atu  harii futuru ida ne’ebé prósperu ba ita-nia povu.”

Dokumentu ne’e agora aprezenta ona iha públiku ne’e kontein rezumu ida iha lian Tetun, Portugés no Inglés. Dokumentu ne’e bele deskarega iha site Gabinete ketan tasik nian iha www.gfm.tl. REMATA