Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 23 fulan-agostu tinan 2016

Governu ba audiénsia Komisaun Konsiliasaun nian iha semana oin mai

Ministru Planeamentu no Investimentu Estratéjiku no Negosiadór Prinsipál ba Ketan Tasik (Fronteira Marítima) nian Kay Rala Xanana Gusmão, no Ministru Estadu no Prezidénsia Konsellu Ministrus, Agio Pereira, sei partisipa iha sesaun públika maklokek (abertura) nian iha Haia, Olanda, iha semana oin-mai.

Sesaun maklokek nian ba audiénsia sira ne’e sei hala’o iha segunda-feira, loron 29 fulan-agostu no halo parte ba prosedimentu konsiliasaun nian entre Repúblika Demokrátika Timor-Leste no Komunidade Austrália. Prosesu ne’e, ne’ebé hatete kona-ba delimitasaun ketan tasik nian entre Timor-Leste no Austrália, hahú tiha ona husi Timor-Leste iha loron 11 fulan-abríl tinan ida ne’e, tuir Aneksu V husi Konvensaun Nasoins Unidas nian kona-ba Direitu Tasi nian.

Tribunál Permanente Arbitrajen (TPA), ne’ebé asegura sekretariadu prosedimentu nian, fó sai komunikadu imprensa ida ne’ebé mak esplika estrutura no kalendáriu audénsia nian sira, hodi define kona-ba prosesu hirak uluk nian no informa disponibilizasaun “webcast” ida (transmisaun direta liuhusi internet) husi sesaun maklokek nian, iha portál TPA.

Komunikadu imprensa disponivel iha ne’e.

“Webcast”, hala’o de’it kobertura ba iha sesaun maklokek nian, sei fó sai iha segunda-feira, loron 29 fulan-agostu, liuhusi link ida ne’e. Diskursu maklokek Timor-Leste nian sei fó sai iha oras tuku 16.45-18.15 (Oras Timor-Leste nian).

Komunikadu imprensa informa katak vídeu sesaun maklokek no transkrisaun sei tau iha portál internet Tribunál Permanente Arbitrajen hafoin remata sesaun.

Hafoin hakotu tiha sesaun públika, sei hahú ho audiénsia privada sira, ne’ebé sei hala’o to’o loron 31 fulan-agostu, hodi trata ba dúvida sira ne’ebé foti husi Austrália kona-ba kompeténsia Komisaun Konsiliasaun nian. Konteúdu husi sesaun hirak ne’e sei la fó sai ba públiku.