Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 18 fulan-agostu tinan 2016

Komemorasaun Aniversáriu FALINTIL nian da-41

Iha loron 20 fulan-agostu, komemora aniversáriu FALINTIL da-41, Forsa Armada sira Libertasaun Nasionál Timor-Leste nian.

Governu hato’o nia respeitu no gratidaun kle’an ba FALINTIL hodi fó ónra ba Funu-na’in sira hotu Libertasaun Nasionál nian, ne’ebé maka ho ninia aten-barani no sakrifisiu, durante luta iha tinan 24 nia laran, lori ona Timor-Leste sai livre no independente.

Primeiru-Ministru, Rui Maria de Araújo, deklara katak “sira-nia mehi ba ukun-rasik-an, no sira-nia determinasaun oinsá hodi halo mehi ne’e sai realidade, husi jerasaun ba jerasaun sei la haluha.

Komemorasaun ofisiál ba Loron FALINTIL sei hala’o iha Kuartél-Jenerál F-FDTL nian, iha sábadu, loron 20 fulan-agostu, maibé molok to’o ba loron ofisiál nian ne’e, hala’o uluk ona mós eventu oin-oin.

Iha loron 18 fulan-agostu, hala’o serimónia ida kona-ba “FALINTIL iha Istória Timor-Leste nian”, iha Auditóriu Kuartél-Jenerál F-FDTL, ho partisipasaun husi Dr.Marí Alkatiri, Dr.José Ramos-Horta no Dr.Francisco Guterres [Lu-Olo], ne’ebé Profesór Dr.Aurélio Guterres mak sai nu’udar moderadór.

Iha sesta-feira, loron 19 fulan-agostu, sei hala’o misa Asaun Grasa nian iha Katedrál Dili husi Amu Bispu Dioseze Dili, Dom Virgilio do Carmo. Iha kalan sei hala’o serimónia tau ai-funan iha Jardin Eroi sira-nian, iha Metinaru.

Iha sábadu, loron 20 fulan-agostu, sei hala’o serimónia prinsipál iha Kuartél-Jenerál F-FDTL nian iha Fatuhada, Dili. Entre konvidadu sira, inklui Primeiru-Ministru Kamboja, Hun Sen, no ninia delegasaun, hamutuk ho militár sira, veteranu no diplomata sira husi mundu tomak. Programa ofisiál ne’e inklui serimónia Hasa’e Bandeira, fahe prémiu no promosaun ba militár sira, diskursu husi Prezidente Parlamentu Nasionál, Dr.Adérito Hugo da Costa, no parada militár. Han-meiudia ofisiál sei hala’o iha Kuartél-Jenerál F-FDTL nian.

Hafoin serimónia Hatún Bandeira, iha Fatuhada, sei hala’o han-kalan ofisiál ida ba konvidadu sira, iha Sentru Konvensaun Dili (CCD), ne’ebé oferese husi Xefe Estadu-Maiór Forsa Armada sira nian, Majór- Jenerál Lere Anan Timur.

Portavós Governu Konstitusionál VI, Ministru Estadu Agio Pereira, hateten katak “liberdade, pás no estabilidade ne’ebé mak ohin ita hetan, harii  liuhusi sakrifísiu husi sira ne’ebé bá uluk tiha ona husi ita sira ne’ebé maka sei hela. Iha loron hirak tuir mai, ita sei hanoin fali FALINTIL no sira hotu ne’ebé  saran tiha ona sira-an hodi  luta ba rai ida ne’e, ho sentimentu respeitu nian ne’ebé kle’an tebes ba sira-nia sakrifísiu no aten-barani. Sira fó iis-kbiit mai ita atu hatutan no harii nasaun ida ne’ebé maka dignu liuhusi sira-nia esforsu sira. Iha loron sira tuir mai – no loron ba loron!-, husi foho aas to’o tasi ibun, husi aldeia ki’ikoan liu to’o sidade sira, feto no mane sira, foin-sa’e no katuas-ferik sira, ita hothotu fó onra ba sira. Viva FALINTIL”.REAMATA