Governu Timor-Leste

Selebrasaun tinan (aniversáriu) da-41 FALINTIL nian, ne’ebé Ministériu Defeza mak organiza, hala’o husi loron 18 to’o loron 20 fulan-agostu, iha Dili.
Iha loron 18, iha auditóriu kuartél-jenerál F-FDTL nian, iha Fatuhada, hala’o semináriu kona-ba “Falintil iha Istória Timor-Leste nian”, ho oradór sira mak hanesan Dr. Mari Alkatiri, ne’ebé sei ko’alia kona-ba deskolonizasaun, kriasaun partidu sira no kriasaun FALINTIL nian; Dr. José Ramos-Horta, ne’ebé sei ko’alia kona-ba organizasaun kombatente no fundadór libertasaun nasionál nian sira no apoiante sira iha Ázia no iha mundu; no Dr. Francisco Guterres Lu-Olo, ne’ebé sei hakle’an kestaun kona-ba definisaun etapa sira rezisténsia armada nian no ikusliu kona-ba etapa soberania tasik (marítima), aéreu no rai-maran atu harii soberania nasionál, pás no estabilidade, ba prosperidade no moris-di’ak. Konferénsia ne’e sei modera husi Dr. Aurélio Guterres.
Iha loron 19 loraik, sei hala’o Misa Agradesimentu, iha katedrál Dili nian. Iha loro-kraik rohan, sei fó omenajen ba eroi nasionál sira, iha Jardín Eroi sira nian, iha Metinaru.
Iha loron 20, FALINTIL nia tinan, iha tuku 8, iha kuartél-jenerál F-FDTL, sei hahú serimónia militár sira, ho partisipasaun espesiál husi Primeiru-Ministru Kamboja, Hun Sen. Molok diskursu husi Prezidente Parlamentu Nasionál, Adérito Hugo da Costa, sei fó sai promosaun militár sira. Molok han-meiudia nian mós, sei iha marxa estudantíl ida . Serimónia hatún bandeira, sei hala’o iha tuku 5 loraik, ne’ebé sei prezide husi Primeiru-Ministru, Rui Maria de Araújo. Han-kalan konfraternizasaun nian, iha Sentru Konvensoins Dili, Xefe Estadu-Maiór-Jenerál F-FDTL sira nian, Majór-Jenerál Lere Anan Timur, maka sei oferese.