Sorumutuk Konsellu Ministrus nian iha loron 16 fulan-agostu tinan 2016
Prezidénsia Konsellu Ministrus
VI Governu Konstitusionál
..............................................................................................................................
Dili, loron 16 fulan-agostu tinan 2016
Komunikadu Imprensa
Sorumutuk Konsellu Ministrus loron 16 fulan-agostu tinan 2016
Konsellu Ministrus hala’o sorumutuk iha loron-tersa ne’e, iha Palásiu Governu, iha Dili, no analiza tiha ona projetu sira husi Ministru Estadu, Koordenadór Asuntu Administrasaun Estadu no Justisa. Projetu haat ne’e maka: revizaun organizasaun Administrasaun Públika, ne’ebé buka atu armoniza modelu organizasaun no funsionamentu husi órgaun no servisu oin-oin ne’ebé integra ba Administrasaun Públika, hodi halo nia sai efikás no efisiente liután iha prestasaun bens no servisu públiku sira; adiamentu prosesu eleisaun nian ba suku sira; harii ekipa sira atu prepara resenseamentu eleitorál iha rai-li’ur, ne’ebé konta ho kooperasaun husi Ministériu Negósius Estranjeirus no Kooperasaun; no adiamentu resenseamentu eleitorál nian.
Sei husi Ministériu Administrasaun Estatál mós, aprova ona Dekretu Governu nian ne’ebé marka loron atu hala’o sorumutuk Asembleia Aldeia nian no Konsellu Suku nian sira iha ámbitu prosesu eleisaun dirijente komunitáriu sira. Sorumutuk Konsellu Suku nian sira ne’ebé hala’o ninia objetivu mak atu konstitui meza eleitorál Suku sira nian no atu simu kandidatura ba Xefe Suku, sei hala’o iha loron 15 fulan-setembru. Sorumutuk Asembleia Aldeia nian sira ne’ebé hala’o ho objetivu atuhili delegadu Aldeia nian sira ba Konsellu Suku, nune’e mós Xefe Aldeia sira no Xefe Suku sira sei hala’o iha loron 30 fulan-setembru. Konsellu Suku nian sira ba apuramentu ikus husi rezultadu eleisaun Xefe Suku nian, hala’o sorumutuk iha loron 1 fulan-outubru. Karik presiza eleisaun Xefe Suku sira nian ba volta daruak, maka sei hala’o iha loron 7 fulan-outubru, ho apuramentu ikus husi rezultadu sira iha loron 18 fulan-outubru. Ikusliu, sorumutuk Konsellu Suku nian sira atu hili Lian-na’in sira nian no reprezentante juventude nian sira iha Konsellu Suku, marka ona ba loron 22 fulan-outubru.
Ministru Estadu Koordenadór Asuntu Ekonómiku, hamutuk ho Diretór-Jerál Floresta no Peska nian sira, aprezenta ona projetu atu hametin rezisténsia tasi-ibun nian hodi proteje komunidade sira ne’ebé hela besik tasi-ibun, no fó mós protesaun naturál nian sira.
Gabinete Primeiru-Ministru nian, análiza ona proposta Lei ne’ebé estabelese rejime jurídiku ba asosiasaun públika profisionál nian sira, profisaun ne’ebé, fó ba sira-nia interese públiku, presiza ninia regra sira rasik husi kontrolu tékniku no deontolojiku nian sira.
Molok vizita Primeiru-Ministru Reinu Kamboja nian ne’ebé sei mai iha Timor-Leste, iha loron 19 no 20 oin-mai, aprova ona asinatura kona-ba akordu rua no Memorandu Entendimentun ida. Akordu sira ne’e regula kooperasaun tékniku no ekonómiku, nune’e mós vistu livre ba titulár pasaporte diplomátiku sira no servisu nian. Memorandu Entendimentu ne’e foka liu ba kooperasaun iha área serbisu nian, maka hanesan, troka informasaun iha área oin-oin sira no interkámbiu pesoál espesialista husi país rua. REMATA
