Konferénsia V kona-ba Deskonsentrasaun, Desentralizasaun Administrativa no Podér Lokál Timor-Leste nian
Konferénsia V kona-ba Deskonsentrasaun, Desentralizasaun Administrativa no Podér Lokál Timor-Leste nian sei hala’o husi loron 17 to’o 19 fulan-agostu, iha Otél Timor, iha Dili.
Primeiru-Ministru, Rui Maria de Araújo, sei halo nia diskursu maklokek. Iha parte dadeer, sei hala’o sesaun tolu, ho nia tema sira maka hanesan: “Prosesu deskonsentrasaun administrativa no nia implikasaun iha Protokolu Kooperasaun entre Timor-Leste, Austrália, Portugál no Xina”; “Kontribuisaun husi investimentu rai-li’ur nian iha prosesu dezenvolvimentu munisipál ba futuru Podér Lokál”; no “Oinsá mak akordu kooperasaun no apoiu nian ba dezenvolvimentu administrativu munisipál, iha períodu deskonsentrasaun administrativa, bele asegura kompeténsia sira iha Munisípiu sira, hodi fó dalan ba autoridade Podér Lokál nian sira hala’o sira-nia responsabilidade”.
Iha loron 18, sesaun serbisu nian sira sei haree liu ba “Modelu sira husi formasaun konjunta” no ba “Sorumutuk ho sidade belun no parseiru munisipál sira”.
Hosi sorumutuk ida ne’e, sei hamosu Deklarasaun Dili nian kona-ba kontinuidade apoiu nian husi Sidade Belun sira Austrália nian no parseiru sira husi autarkia Portugál ba prosesu Desentralizasaun Administrativa iha Timor-Leste. Sesaun maktakak (enserramentu), sei hala’o husi Vise-Ministru Administrasaun Estatál, Tomás Cabral.
Iha loron ikus Konferésia nian, loron 19, delegasaun sira ne’ebé prezente sei hala’o vizita balu, hanesan ba Muzeu Rezisténsia nian, Semitériu Santa Krus, Jardín Eroi sira nian iha Metinaru no ba Behau, iha Ilimanu.
Iha eventu ne’e sei marka prezensa, delegasaun sira husi Timor-Leste, Portugál, Austrália no Xina, ne’ebé husi loron 13 to’o 17 fulan-agostu, sei hala’o vizita ba munisípiu no postu administrativu balu, hodi troka esperiénsia no atualiza Programa Nasionál Dezenvolvimentu Suku (PNDS) no Planu Dezenvolvimentu Integradu Munisipál (PDIM).
Konferénsia V kona-ba Deskonsentrasaun, Desentralizasaun Administrativa no Podér Lokál iha Timor-Leste ne’e ninia objetivu prinsipál mak atu analiza no asegura kontinuidade husi apoiu no kontributu tékniku no materiál husi parseiru internasionál sira.
