Governu simu partisipante sira iha Konferénsia Sosiedade Sivíl ASEAN nian ba tinan 2016
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 2 fulan-agostu tinan 2016
Governu simu partisipante sira iha Konferénsia Sosiedade Sivíl ASEAN nian ba tinan 2016
Governu Timor-Leste fó boazvindas ba delegadu sira hotu ne’ebé sei partisipa iha Konferénsia Sosiedade Sivíl ASEAN nian / Forum povu sira ASEAN nian ba tinan 2016, iha Dili. Konferénsia ne’e, ne’ebé sei hala’o iha Sentru Konvensaun Dili, husi loron 3 to’o loron5 fulan-agostu, sei halibur delegadu hamutuk 800, no besik metade husi sira ne’e mai husi país sira ASEAN nian.
Partisipante sira husi organizasaun sosiedade sivíl husi Estadu-membru ASEAN nian sira sei halibur malu hamutuk ho parseiru timoroan sira atu diskute tema “Habelar solidariedade povu sira nian ba komunidade ASEAN nian ida ne’ebé justa no inkluziva”.
Governu hahii serbisu husi Komité Organizadór Nasionál, ba preparasaun konferénsia ne’e nian no atividade barak seluk ne’ebé iha ligasaun, ne’ebé prevee ona ba semana ne’e, liuliu festivál sinema nian ida, kalan solidaridade nian ida, vizita ba komunidade sira, sesaun serbisu nian sira no debate nakloke ida ho deputadu sira husi país ASEAN nian sira. Maske konferénsia ne’e nu’udar eventu independente ida, Governu fó ona ninia tulun, atu fasilita, bainhira de’it presiza, ba buat ida ne’ebé prevee ona atu sai hanesan forun boot liu ida ne’ebé sei hala’o iha Dili.
Primeiru-Ministru, Rui Maria de Araújo, hetan konvite atu sai oradór prinsipál serimónia abertura XI Fórum Povu sira ASEAN ne’e nian, iha loron 3 fulan-agostu. Xefe Ezekutivu Timor-Leste sei tuir sorumutuk lubuk ida ho partisipante nasionál no rejionál oin-oin, atu diskute kona-ba kompromisu sosiedade sivíl nian ho Governu. Prevee ona mós katak Ministru Planeamentu no Investimentu Estratéjiku, Kay Rala Xanana Gusmão, sei hato’o mós diskursu ba delegadu sira konferénsia nian ho tema “As pessoas no centro” [“ema maka iha sentru” – iha sekuénsia husi apelu Papa Francisco nian, ne’ebé apela atu “tau hanesan sentru ba atensaun sosiál no polítika ema sira ne’ebé kbiit laek liu”] .
Interasaun ne’ebé konstrutiva ho organizasaun sosiedade sivíl Timor-Leste nian sira sai ona karakterístika Governu Konstitusionál VI nian.
Prepara ona mós Deklarasaun Konjunta ida husi Konferénsia Sosiedade Sivíl ASEAN nian ida / Fórum Povu sira ASEAN nian ba tinan 2016, molok Konferénsia, ne’ebé bele haree iha http://aseanpeople.org/expanding-peoples-solidariy/
REMATA
