Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 1 fulan-agostu tinan 2016

Governu promove Semináriu Internasionál kona-ba Justisa

Governu, liuhusi Ministériu Justisa, partisipa iha organizasaun Semináriu Internasionál kona-ba “Tribunál sira iha Estadu Direitu”, ne’ebé hala’o husi loron 27 to’o 29 fulan-jullu iha Salaun Ministériu Negósius Estranjeirus no Kooperasaun, iha Dili. Eventu ne’e halibur juís, profesór universidade nian, advogadu no jurista sira husi nasaun Lian Portugés sira husi mundu tomak, atu debate kona-ba kestaun sira ne’ebé relasiona ho Estadu Direitu, independénsia podér judisiál nian no polítika sira, sistema no jestaun judisiál sira.

Iha serimónia maklokek nian, Primeiru-Ministru, Rui Maria de Araújo, konsidera katak Semináriu ne’e hatudu “ba hotu-hotu, relevánsia institusionál ne’ebé boot, liuliu ba ami-nia nasaun joven Timor-Leste”. Na’i-ulun ne’e hatutan mós katak povu timoroan bele sente orgullu “tanba konsege kria ona infraestrutura ba instituisaun no servisu hirak ne’ebé esensiál ba Estadu demokrátiku soberanu ne’ebé ba nia maka, naturalmente, instituisaun justisa nian sira halo parte”, hodi fó hanoin katak “ita kontinua halo serbisu iha sentidu atu hadi’a no fortalese nia”.

Durante loron rua dahuluk sorumutuk nian, majistradu sira hosi Angola, Brazíl, Kabuverde, Giné-Bisau, Makau, Mosambike, Portugál, Saun Tomé no Prínsipe no mós Timor-Leste partisipa iha painél debate nian hamutuk haat. Iha loron datoluk no loron ikus Semináriu ne’e nian  iha sorumutuk Asembleia Jerál husi Uniaun Internasionál Juís sira Lian Portugés nian.

Iha mós debate kona-ba reforma balun husi Governu Konstitusionál ba setór lejizlativu no Justisa nian. Reforma hirak ne’e inklui investigasaun kona-ba normalizasaun no armonizasaun lei sira nian, ne’ebé daudaun ne’e Komisaun ba Reforma Lejizlativa no Reforma Setór Justisa nian maka hala’o hela. Primeiru-Ministru hateten klaru katak organizasaun ba sistema judisiál presiza kontinua atu dezenvolve an ho forma ida ne’ebé habesik “liután tribunál sira ba populasaun sira” hodi fó ba sira  “kompriensaun kona-ba justisa efetiva”. Daudaun ne’e Governu fó hela apoiu ba fortalesimentu tantu rekursu umanu no mós teknolójiku sira setór ne’e nian, atu nune’e bele permite servisu sira ne’ebé iha kualidade no iha tempu ne’ebé util.

Primeiru-Ministru felisita partisipante sira Semináriu ne’e nian no reforsa “importánsia husi majistradu sira no funsionáriu justisa nian sira hotu no sira-nia knaar nivel aas nian ba servisu kona-ba interese nasaun no sidadaun sira nian”.