Primeiru-Ministru Rui Maria de Araújo, halo lansamentu ba Ajénsia Notisioza Timor-Leste (ANTIL) iha Díli, kuarta-feira, loron 27 fulan-jullu 2016.

Iha serimónia ne’e, Primeiru-Ministru loke ba públiku atu asesu informasaun liuhusi portál notísia ANTIL nian ho nia enderesu eletróniku www.antil.tl. Portál ne’e bele asesu liuhusi web portál ka komputadór no liuhusi telemóvel sira ne’ebé iha sistema Android no iOS.Xefe Governu ne’e  hateten, konstrusaun nasaun halo ho pasu ki’ik maibé firme no hateke ba futuru. Portál ida ne’e importante tebes, tanba nia reprezenta pasu ki’ik ida ba nasaun, maibé  pasu boot ida ba-iha dezenvolvimentu komunikasaun sosiál iha Timor-Leste. La iha ema ida maka kestiona direitu ba informasaun, direitu ida ne’ebé ema ida labele hasai hosi sidadaun hotu-hotu. Iha implementasaun dala balun ema viola direitu ne’e. Pasu ida ne’e refleta responsabilidade sentidu dignidade sidadaun nian atu hetan informasaun.

Xefe Ezekutivu ne’e hatutan tan, dezafiu ba imparsialidade sei mosu nafatin bainhira iha interese sira maka no bele afetadu. Tanba ne’e husu ba ekipa ANTIL atu serbisu kaer metin ba prinsípiu kódigu étika jornalizmu nian, keta hakfodak ba presaun sira ne’ebé maka mai.

Sekretáriu Estadu Komunikasaun Sosiál, Nélio Isaac Sarmento iha nia diskursu hateten, objetivu prinsipál ANTIL nian, la’ós  atu halo konkorrénsia ho órgaun komunikasaun sosiál sira seluk, maibé atu kompleta informasaun ba ita-nia sosiedade, nune’e mós sai referénsia ba órgaun komunikasaun sosiál nasionál no profisionál sira komunikasaun sosniál nian, hodi hasa’e sira-nia koñesimentu ne’ebé bazeia ba dadus no faktu.

Atu hetan asesu ba Komunikadu Imprensa Porta-Voz Governu nian kona-ba assunto ne’e, hanehan iha ne’e.