Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 29 fulan-jullu tinan 2016

Governu lansa faze dahuluk Ajénsia Notisioza Timor-Leste nian

Governu kumpre tan ona pontu ida husi nia Programa, ho lansamentu portál internét nian www.antil.tl, ne’ebé sei sai vizível liu ba Ajénsia Notisioza Timor-Leste nian (ANTIL). Iha serimónia ofisiál, ne’ebé hala’o iha Dili, iha loron 27 fulan-jullu liubá, Primeiru-Ministru, Rui Maria de Araújo, esplika ona katak Ajénsia ne’e sei hadi’a rekolla no habelar informasaun sira kona-ba país, iha territóriu tomak, nasionál no internasionál.

Sekretáriu Estadu Komunikasaun Sosiál, Nélio Isaac Sarmento esplika ona katak, ninia objetivu mak atu halo ANTIL hanesan fonte nasionál referénsia nian ida ba notísia sira ho kualidade no informasaun ne’ebé kredível, hodi hatán ba nesesidade sidadaun sira nian iha “era informasaun nian”. Nia kriasaun prevee ona iha Programa Governu nian, ne’ebé publika iha fulan-marsu tinan 2015, hetan ona aprovasaun husi Konsellu Ministrus iha loron 3 fulan-fevereiru tinan 2016 no publika tiha ona iha fulan tuir-mai iha Jornál Repúblika nian.

Primeiru-Ministru no Sekretáriu Estadu esplika ona katak Ajénsia iha planu serbisu nian ida hodi hadi’a ninia kapasidade teknolójika no kualidade kona-ba ninia rekursu umanu sira.

Iha portál aprezenta fotografia, vidéo no testu sira, ho konteúdu sira iha Tetun, Portugés no Inglés. Bele iha asesu mós ba vizualizasaun iha telefone intelijente sira (“smartphones”). Pesoál Ajénsia nian mak sei prodúz notísia nasionál no rejionál  nian sira.

Portavóz Governu nian, Ministru Estadu Agio Pereira, hateten katak “lansamentu ne’e faze dahuluk Ajénsia Notisioza Timor-Leste nian mak realidade ida tan hosi promesa ida Governu Konstitusionál VI nian no marka inisíu habelar tan informasaun nian ba povu Timor-Leste, atu nune’e, bele sensibiliza no haburas partisipasaun ema hotu-hotu nian iha dezenvolvimentu nasaun.”