………………………………………………………………………………………………………………
Díli, loron 15 fulan-jullu tinan 2016
Komunikadu Imprensa
Sorumutuk Konsellu Ministrus nian iha loron 15 fulan-jullu tinan 2016
Konsellu Ministrus hala’o sorumutuk iha loron-sesta, iha Palásiu Governu, iha Dili, no aprova ona asinatura ba Akordu-Kuadru kona-ba Kontribuisaun Finanseira Repúblika Demokrátika Timor-Leste nian ba Igreija Katólika. Akordu ne’e prevee katak kontribuisaun finanseira ne’ebé tinan-tinan Timor-Leste fó ba Igreja Katólika, ba atividade sira ho karakter sosiál no edukativu no ba governu ekleziál nia objetivu sira, regula husi akordu espesífiku entre Governu no Konferénsia Episkopál Timor nian no depende ba disponilidade finanseira Estadu nian. Atu fó hanoin fali katak regra sira kona-ba kontribuisaun finanseira ne’e prevee ona iha akordu entre Timor-Leste no Santa Sé iha fulan-agostu tinan kotuk.
Kona-ba nomeasaun membru sira husi Komisaun Nasionál Eleisaun (CNE-iha dalen portugés), ne’ebé hala’o hela, Governu tenke indika komisáriu ida husi komisáriu na’in hitu, tuir alterasaun daruak ba Lei n.U 5/2006, loron 28 fulan-dezembru. Konsellu Ministrus nomeia ona Odete Maria Belo ba komisária CNE nian no Teresinha Maria Noronha Cardoso ba komisária suplente no agora sei hato’o ba Parlamentu Nasionál kona-ba ninia desizaun.
Konsellu Ministrus analiza ona mós evolusaun husi projetu infraestrutura bázika boot rua, liuliu atu hadi’a no manutensaun estrada Dili ba Tibar no operasaun servisu manutensaun Sentrál elétrika Hera no mós Betanu nian. Ministériu Obras Públikas, Transporte no Komunikasaun nian aprezenta ona planu asaun ba prosesu selun (pagamentu) projetu sira infraestrutura bázika esensiál nian.