Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 15 fulan-jullu tinan 2016

Governu felisita Primeiru-Ministru eleitu Austrália nian

Governu Timor-Leste hato’o ninia ksolok boot ba Malcolm Turnbull, deputadu australianu no dirijente Partidu Liberál Austrália nian, tanba eleitu ona ba Kámara Reprezentante sira nian husi le’un (sírkulu) Wentworth nian, no tanba nia kontinua ninia knaar nu’udar Primeiru-Ministru Austrália nian.

Iha karta ida ne’ebé haruka atu hato’o felisitasaun ba Turnbull, Primeiru-Ministru, Rui Maria de Araújo, dehan  katak “Austrália ne’e hanesan Timor-Leste nia nasaun viziñu no belun di’ak”, no nasaun rua ne’e partilla istória únika ida, valór komún sira no relasaun interpesoál sira ne’ebé  metin.

Primeiru-Ministru hato’o ninia fiar-metin katak, iha sekuénsia husi vitória eleitorál ida ne’e, nasaun rua ne’ehela iha pozisaun ne’ebé di’ak atu hametin liután sira-nia relasaun bilaterál sira. Na’i-ulun ne’e hein katak bele iha biban iha tempu badak  nia laran atu deskute kestaun fronteira tasi nian sira ne’ebé permanente no kestaun sira seluk ne’ebé sai hanesan interese nasaun rua ne’e nian, no mós projetu kooperasaun nian no hametin lasu amizade nian sira.