Idul Fitri selebra iha ambiente toleránsia no respeitu nian
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 7 fulan-jullu tinan 2016
Idul Fitri selebra iha ambiente toleránsia no respeitu nian
Governu hato’o ninia ksolok no solidariedade ba komunidade musulmana Timor-Leste nian iha selebrasaun Idul Fitri, ne’ebé marka períodu ikus husi jejun Ramadaun nian. Ida ne’e hanesan momentu festa no perdaun nian ida ba família musulmana sira, la’ós de’it ita-nia rejiaun, maibé ba komunidade izlámika hotu ne’ebé namkari iha mundu.
Iha Timor-Leste, ne’e hanesan biban ida ba ema hotu-hotu atu hanoin fila-fali importánsia husi dame, toleránsia no solidariedade.
Iha tinan 2005, feriadu Idul Fitri hetan aprovasaun iha Timor-Leste no, iha fulan-janeiru tinan ida-ne’e, Governu aponta ona katak komemorasaun loron ne’e sei hala’o iha loron 7 fulan-jullu. Ba ida ne’e, funsionáriu sira tomak Governu nian hetan toleránsia iha loron ida molok atu tama ba Idul Fitri, loron 6 fulan-jullu, atu halo preparasaun no dezlokasaun hodi hasoru malu ho família
Povu Timor-Leste nafatin hako’ak tradisaun, kultura no relijiaun oin-oin, ne’ebé karakteriza nasaun ne’e, no defende valór universál sira kona-ba perdaun, amizade, toleránsia no dame nian.
