Governu fó sai Prioridade Nasionál sira ba tinan 2017
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 5 fulan-jullu tinan 2016
Governu fó sai Prioridade Nasionál sira ba tinan 2017
Primeiru-Ministru, Rui Maria de Araújo, fó sai Prioridade Nasionál sira Governu Konstitusionál VI nian ba tinan 2017, ne’ebé haree liu ba “agrikultura (luta kontra hamlaha no laiha nutrisaun), saúde, edukasaun, bee no saneamentu, infraestrutura bázika no eleisaun iha tinan oin”.
Prioridade Nasionál sira ba tinan 2017 ne’e tama iha kuadru ne’ebé luan liu iha Planu Dezenvolvimentu Estratéjiku Timor-Leste nian tinan 2011-2030 no programa Governu Konstitusionál VI tinan 2015-2017 nian. Primeiru-Ministru hateten katak prioridade hirak ne’e identifika liuhusi serbisu ne’ebé Governu hala’o to’o oras ne’e atubele hatama Objetivu Dezenvolvimentu Sustentavel foun sira husi Nasoins Unidas [ODS] nian iha planeamentu hotu no iha orsamentu Governu nian ba tinan 2017.
Grupu Traballu ida husi Governu nian ba ODS, harii hafoin meta sira ne’e adota iha Konferénsia Nasoins Unidas nian iha tinan kotuk, ne’ebé estuda ona to’o oras ne’e objetivu 17 ne’ebé define tiha ona no identifika forma sira kona-ba oinsá atu alkansa objetivu sira ne’e iha Timor-Leste. Grupu Traballu ne’e serbisu iha koordenasaun no konsulta ne’ebé besik ho órgaun Governu nian sira hotu, organizasaun sira sosiedade sivíl no parseiru dezenvolvimentu nian sira. Hamutuk, hotu-hotu iha kompromisu atu habelar informasaun sira kona-ba dalan hirak ne’ebé hetan ona atu konkretiza ODS no atu serbisu hamutuk ho parte interesada sira, iha monitorizasaun ba evolusaun no aprezentasaun husi rezultadu sira.
Primeiru-Ministru esplika katak Prioridade Nasionál sira ba tinan 2017 signifika Governu sei haree liu ba objetivu sira iha númeru 2 (nutrisaun no seguransa ai-han), númeru 4 (edukasaun) no númeru 9 (infrastrutura sira), maibé la haluha mós objetivu sira seluk kona-ba dezenvolvimentu umanu, hanesan saúde (ODS númeru 3), igualdade jéneru (ODS númeru 5) bee no saneamentu (ODS númeru 6). Eleisaun Prezidensiál sira, ne’ebé sei hala’o iha semestre dahuluk tinan 2017 nian, tuir fali ho eleisaun lejizlativa sira, iha semestre daruak iha tinanhanesan, maka hanesan mós prioridade sira seluk ba 2017 nian.
Primeiru-Ministru afirma fila-fali katak Governu Timor-Leste iha “kompromisu ne’ebé boot tebe-tebes atu atinje meta no indikadór sira husi Objetivu Dezenvolvimentu Sustentavel sira.
