Governu hametin koordenasaun ho parseiru dezenvolvimentu nian sira

Governu Timor-Leste organiza sorumutuk ho parseiru dezenvolvimentu nian sira ba tinan 2016 nian ne’ebé hahú ona ohin, loron 4 fulan-jullu, iha Sentru Konvensaun Dili. Tuir Primeiru-Ministru, Rui Maria de Araújo, sorumutuk ne’e hanesan oportunidade ida hodi “diskute no troka ideia kona-ba dezafiu hirak ne’ebé la dook malu, lisaun sira ne’ebé ita aprende no medida hirak tuirmai ne’ebé Timor-Leste atu foti iha dalan progresu nian”.

Sorumutuk anuál sira ne’e Governu konvoka atu hadi’a aliñamentu no hametin kooperasaun ho parseiru dezenvolvimentu nian sira, atubele hetan rezultadu ne’ebé di’ak liu ba povu Timor-Leste.

Primeiru-Ministru Araújo hateten katak tema ba tinan ne’e, “Finansiamentu ba dezenvolvimentu sustentavel iha Timor-Leste”, hanesan afirmasaun ida kona-ba “kompromisu Governu nian hodi implementa Objetivu sira husi Dezenvolvimentu Estratéjiku iha nivel nasionál, no determina forma ne’ebé di’ak  hodi finansia objetivu sira ne’e.

Durante loron rua, membru Governu no Parlamentu Nasionál nian sira, reprezentante sira husi parseiru dezenvolvimentu nian, partisipante sira husi organizasaun sosiedade sivíl sira no setór privadu, hamutuk ho delegadu sira husi G7+, sei halo reflesaun kona-ba progresu ne’ebé Timo-Leste hetan ona iha ezekusaun faze dahuluk husi Planu Estratéjiku Dezenvolvimentu nian iha Polítika Asisténsia nian, knaar husi setór privadu ba dezenvolvimentu nasionál no impaktu husi reforma sira ne’ebé halo ikus-ikus ne’e. Debate hirak ne’e sei permite kontribuisaun sira, liuliu kona-ba ezekusaun no finansiamentu ba Objetivu sira husi Dezenvolvimentu Sustentavel. Sei debate mós, iha sorumutuk ne’e, preparativu sira ba eleisaun tinan 2017 nian, atu masimiza koordenasaun ho parseiru sira.

Iha tersa loro-kraik, loron 5, sei distribui komunikadu ida kona-ba rezultadu sorumutuk ne’e nian no reflete konsensu husi partisipante sira kona-ba koordenasaun ne’ebé hala’o daudaun ona entre Governu ho parseiru dezenvolvimentu nian sira.

Primeiru-Ministru, Rui Maria de Araújo hateten katak nia hakarak atu loron 4 fulan-jullu tinan 2016, “ema bele lembra hanesan lansamentu simbóliku husi Objetivu sira husi Dezenvolvimentu Sustentavel iha Timor-Leste, atu nune’e ita hotu bele sai sasin ba envolvimentu no kompromisu ajénsia ida-idak ne’ebé ita reprezenta, hodi to’o ba objetivu globál sira ne’e”.