Sekretáriu Estadu Komunikasaun Sosiál (SEKOMS), Nélio Isaac Sarmento inaugura Rádiu Tatamailau, Munisípiu Ainaru, iha sesta, loron 24 fulanjuñu 2016, liuhusi serimónia asina plaka inaugurasaun Rádiu ne’e nian ne’ebéasiste mós husi Administradór Munisípiu Ainaru, Martinho de Araújo, Prezidente Konsellu Rádiu Lian Tatamailau, Francisco Barros no Jestóra Rádiu Komunidade Lian Tatamailau, Rita Barros.
Orsamentu ba konstrusaun edifísiu estasaun Rádiu ne’e nian hamutuk dolar amerika rihun 246, husi Fundu Infraestrutura iha Ministériu Planeamentu no Investimentu Estratéjiku. Kompañia Rocky Construction maka hetan fiar halo konstrusaun ne’e.
Iha ninia diskursu, Sekretáriu Estadu ne’e hateten katak Governu Timor-Leste, liuhusi programa Komunikasaun Sosiál, kontinua kria kondisaun no dezenvolve meiu komunikasaun sosiál sira iha rai laran hodi divulga informasuan ba públiku no sai media edukativu ba sidadaun hotu: “Atu nasaun ida ne’e bá oin, la’ós depende de’it ba oinsá sidadaun hotu sente rezultadu husi dezenvovimentu, maibé mós bele sente iha asesu ba informasaun, liuhusi rona, lee no haree informasuan liuhusi Komunikasaun Sosiál, nune’e, aumenta kapasidade hodi envolve iha prosesu dezenvolvimentu”.
Sekretáriu Estudu husu ba autoridade lokál no populasaun sira iha Munisípiu Ainaru, atu servisu hamutuk ho Konsellu no jestór sira iha Rádiu Lian Tatamailau, tau-matan ba sustentabilidade konstrusaun ne’e. Nia mós husu ba Prezidente Konsellu no Jestora Rádiu, atu hametin papél fahe informasaun ba komunidade no servisu hamutuk ho autoridade Munisípiu Ainaru atu habelar informasaun ba komunidade kona-ba Governu distritál no Governu sentrál nia polítika dezenvolvimentu.
Entretantu Administradór Munisípiu Ainaru, Martinho de Araújo, rekoñese prezensa edisífiu foun iha Ainaru ne’e hanesan previléjiu boot, tanba sai projetu pilotu primeiru iha Timor-Leste: “Munisípiu Ainaru kontente tanba hetan uluk edifísiu foun. Autroridade Munisípiu prontu atu serbisu hamutuk ho Rádiu Lian Tatamailau, atu sai forte no sai instrumentu ida hodi hato’o progresu dezenvolvimentu iha Munisípiu ne’e ba povu”, Administradór hateten.
Prezidente Konsellu Rádiu Lian Tatamailau, Francisco Barros, agardese tebes ba Governu ne’ebé harii tiha ona edifísiu Rádiu ne’e no fó vantajen boot ba komunidade Ainaru, tanba husi fatin ne’e frekuénsia Rádiu Lian Tatamailau kobre fatin hotu-hotu Munisípiu nian.
Jestora Rádiu Komunidade Lian Tatamailau, Rita Barros, haktuir katak Rádio Lian Tatamailau marka tan istória foun. “Ami la espera ida ne’e atu akontese iha Munisípiu ida-ne’e, maibé ami-nia mehi sai duni realidade”, nia dehan.
Ba futuru, Rita Barros husu mós ba Governu no autoridade lokál atu kontinua fó apoiu, hodi rezolve difikuldade sira no hametin Rádiu ho nia programa sira di’ak liután iha futuru.