Sekretáriu Estadu Juventude no Desportu, Leovigildo Hornai, hala’o sorumutuk ho reprezentante hosi Óspitál Royal Darwin, Australia, Abigail Trewn no Michelle Foster iha Dili, loron 13 fulan-juñu 2016 hodi koa’lia kona-ba apoiu implementasaun ba eventu Tour Timor.

Iha sorumutuk ne’e, Sekretariu Estadu Leovigildo Hornai agradese ba Óspitál Royal Darwin ne’ebé hatudu vontade di’ak atu apoia eventu tinan ida-ne’e. “Ne’e hametin liután relasaun entre ekipa médika sira-ne’ebé envolve iha eventu ne’e. Kolaborasaun ne’e sai nu’udar biban ida ba ekipa Timoroan sira atu bele aprende liután, hosi esperénsia ne’ebé ekipa Óspitál Royal Darwin,  nian oferese”, Sekretáriu Estadu Leovigildo esplika. Ekipa médiku Timoroan sira maihusi Ministériu Saúde no organizasaun Cruz Vermella Timor-Leste nian (CVTL),  sei servisu hamutuk ho ekipa Darwin.

Entertantu, reprezentante Óspitál Royal Darwin sente orgullu hodi  fó apoiu ba eventu tinan ida-ne’e. Ekipa hosi Óspitál Royal Darwin  kompostu hosi ema na’in 25, maka hanesan ekipa médiku, fizioterapia, no selukseluk.

Komisaun Organizadora lansa ona prosesu inskrisaun ba atleta nasionál no internasionál, ne’ebé hahú tiha ona iha loron 6 fulan-juñu 2016 liubá. Ba tinan 2016, Tour de Timor sei oferese prémiu osan ho  montante U$. 55.000,00. Valór  ne’e la inklui bonus hirak ne’ebé komisaun sei oferese ba manan na’in dahuluk to’o datoluk sira.

“Ami mós tenta hodi fó apoiu ba eventu Dili Maratona Internasionál, ne’ebé sei hala’o iha loron 8 fulan-outubru 2016,” Diretora Divizaun Prevensaun  Dezastre Óspitál tenik tan.

Ba Dili Maratona,  Komisaun Organzadora  prepara prémiu osan ho totál U$. 68.000,00, la inklui bonus ba atleta nasionál sira ,ne’ebé konsege atinje record nasionál foun  husi feto no mane.