Sorumutuk Konsellu Ministrus nian iha loron 22 fulan-juñu tinan 2016
Prezidénsia Konsellu Ministrus
VI Governu Konstitusionál
..............................................................................................................................
Díli, loron 22 fulan-juñu tinan 2016
Komunikadu Imprensa
Sorumutuk Konsellu Ministrus nian iha loron 22 fulan-juñu tinan 2016
Konsellu Ministrus hala’o sorumutuk kuarta-feira ne’e, iha Palásiu Governu, iha Dili no aprova ona Proposta Lei ba Alterasaun Dahuluk kona-ba Lei nu.1/2016, loron 14 fulan-janeiru, ne’ebé aprova Orsamentu-Jerál Estadu nian ba tinan 2016.
Orsamentu retifikativu ne’e mosu tanba presiza atu fó kontinuasaun ba projetu infraestrutura vitál sira ne’ebé avansa lalais liu la tuir ninia previzaun. Aumentu orsamentu ba kapitál dezenvolvimentu, iha tinan 2016 nian, tanba atu labele hatodan orsamentu tinan 2017 no atrazu ruma iha dezenvolvimentu projetu boot sira ne’ebé importante. Governu konsidera katak medida ne’e sei lori benefísiu ekonómiku ne’ebé lais liu ba país no hodi kontribui ba diversifikasaun ekonómika.
