Konferénsia Internasionál kona-ba Futuru Lian Portugés nian iha Sistema Mundiál sei hala’o iha loron 15 no 16 fulan-juñu, iha Sentru Konvensaun Dili, iha ámbitu prezidénsia rotativa Komunidade Rain Lian Portugés sira (CPLP), ne’ebé Timor-Leste asume.
Eventu ne’e organiza husi Komisaun Nasionál Timor-Leste nian ba Institutu Internasionál Lian Portugés (IILP), ho kolaborasaun husi Diresaun ezekutiva IILP nian, no ninia tema maka “Lian Portugés no Globalizasaun”

Konferénsia Maklokek nian, Mari Alkatiri, eis-Primeiru-Ministru Timor nian, maka sei halo, no sei integra pontu temátiku prinsipál haat.
Iha loron 15 fulan-juñu, sei debate kona-ba pontu prinsipál rua:
- “Portugés, lian pluriséntrika sék. XXI nian”, ne’ebé integra intervensaun husi akadémiku naran-boot sira. Pontu prinsipál ida ne’e, António Correia e Silva, dosente husi Universidade Kabu-Verde, maka sei introdús.
- “Ensinu no formasaun iha Lian Portugés iha kontestu multilinge sira” ne’ebé akadémiku ho reputasaun di’ak sira maka sei reflete hamutuk, no palestra enkuadramentu nian, Edleise Mendes, Prezidente Sosiedade Internasionál Portugés Lian Estranjeira, no dosente husi Universidade Federal Baía nian, maka sei halo.

Iha loron 16 fulan-juñu, komunikasaun no debate sira sei foka ba pontu prinsipál rua:
- “Potensiál ekonómiku Lian Portugés nian”, ne’ebé sei integra reflesaun balun husi espesialista sira, no palestra enkuadramentu nian, Ana Paula Laborinho, Prezidente Komisaun Nasionál Portugál nian ba IILP, no Prezidente husi Camões Instituto da Cooperação e da Língua, maka sei halo;
- “Portugués, lian kultura, siénsia no inovasaun nian”, ne’ebé akadémiku ho reputasaun di’ak sira maka sei reflete hamutuk, no ninia palestra enkuadramentu nian, Moisés Martins, dosente husi Universidade do Minho (Portugal), maka sei halo.
Intervensaun maktakak nian sira sei halo husi João Inocêncio Piedade, ne’ebé sei ko’alia kona-ba “Mediasaun istórika Lian Portugés nian iha kultura no identidade timoroan sira nian”, no husi Lourenço do Rosário, ho disertasaun ida kona-ba “Polítika sira no jestaun kona-ba Lian Portugés”