Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 13 fulan-juñu tinan 2016

Primeiru-Ministru avansa ho Ajenda Governu nian iha Bruxelas no Estadus Unidus

Xefe Governu sei partisipa iha sorumutuk balun ho desizor polítiku no personalidade influente (ema ne’ebé iha kbiit atu bele fó nia hanoin ruma) sira iha Bruxelas, Washington no Novaiorke, nia objetivu maka hodi hadi’a kooperasaun internasionál no hodi aprezenta pozisaun Governu nian kona-ba problema interese nasionál nian sira.

Primeiru-Ministru sei husik hela Díli hodi bá Bruxelas iha tersa, loron 14 fulan-juñu, hodi partisipa iha forum europeu ba problema dezenvolvimentu no kooperasaun internasionál, no Jornadas Europeias ba Dezenvolvimentu nian. Sei hasoru-malu ho Prezidente Repúblika Sentru-Afrikana, Primeiru-Ministru Repúblika Federál Demokrátika Etíopia no Ministru Dezenvolvimentu Internasionál Suésia, hodi debate forma asisténsia ne’ebé efisiente. Nune’e mós sei halo diskursu ida, ne’ebé foka liubá iha área dezenvolvimentu Timor-Leste nian, no hodi esplika progresu ne’ebé maka hetan ona iha aplikasaun ba Objetivu Dezenvolvimentu Sustentavel sira Nasoins Unidas nian.

Iha marjen forum nian, sei hala’o sorumutuk bilaterál ho lider nasionál sira.

Primeiru-Ministru mós sei vizita Estadus Unidus Amérika, liuliu iha Washington DC no Novaiorke, iha ne’ebé nia sei hala’o sorumutuk balum no partisipa iha forum sira hodi promove interese Timor-Leste nian sira.

Portavós, Ministru Estadu Agio Pereira, hateten katak “ Governu promete fó apoiu hodi hadi’a kooperasaun internasionál ba dezenvolvimentu no kontinua sai hanesan defensór ba implementasaun Objetivu Dezenvolvimentu Sustentavel nian. Aleinde ne’e, presiza konta ho apoiu internasonál no rekoñesimentu ba ita-nia esforsu hodi hetan delimitasaun ita-nia fronteira marítima sira. Tanba motivu tolu ne’e, viajen Primeiru-Ministru  nian ne’e importante no akontese iha momentu estratéjiku ba interese nasionál sira”.

Primeiru-Ministru fila-hikas mai Dili iha loron 2 fulan-jullu.