Ministériu Obras Públikas, Transportes no Komunikasaun lansa Livru Rekursu Ídriku iha Timor-Leste, iha loron 25 fulan-maiu tinan 2016 iha salaun enkontru MOPTK – Merkadu Lama, Dili.

Ministru Obras Públikas, Transporte no Komunikasaun, Gastão de Sousa, hato’o parabéns ba ekipa téknika ne’ebé prepara livru informativu ne’e, atu ema hotu hatene kona-ba rekursu bee iha Timor-Leste. “Ne’e la’ós sientífiku maibé informativu ida atu populasaun tomak bele uza, liuliu joven sira, bele hatene oinsá kria rekursu ídriku iha Timor-Leste”, Ministru Gastão dehan.

Ministru ne’e informa mós katak to’o agora seidauk bele rezolve problema bee iha rai-laran, hein katak parseiru sira hosi Governu Austrália, ADB, servisu hamutuk ho UNICEF, Koreia Sul, bele tau hamutuk rekursu atu rezolve, pelumenus populasaun sira bele asesu ba bee-moos ho di’ak. 

Vise-Ministru Obras Públikas, Transporte no Komunikasaun, Januário da Costa Pereira, hateten bee hanesan rekursu esensiál ba ita ema nia moris. Bee mós iha valór sosiál, ekonómiku, kulturál no serve ba konvivénsia tomak.

Nia hatutan katak durante ne’e Diresaun Nasionál Kontrolu Bee hetan apoiu hosi parseiru dezenvolvimentu, hanesan Noruega no USAID liuhosi programa BESIK.

Prosesu hakerek livru ne’e durante tinan tolu, uza lian tolu, Portugés, Inglés no Tetun. “Mai ita hotu hamutuk prezerva rekursu bee, atu nune’e iha futuru oan sira no bei oan sira bele dezenvolve rai ne’e ho di’ak”, nia dehan tan.

Diretór Diresaun Nasionál Kontrolu Kualidade Bee, Gregório de Araújo, bolu atensaun kona-ba nesesidade atu jere didiak konsumu bee-moos nian.

Partisipa iha lansamentu, Diretór-Jerál, Diretór Nasionál sira, Xefe Departamentu sira husi MOPTK inklui funsionáriu sira, reprezentante husi parseiru ba dezenvolvimentu sira, Sosiedade Sivíl, konvidadu sira hosi Ministériu sira seluk, Universidade sira.