Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 3 fulan-juñu tinan 2016

Konférensia Internasionál kona-ba Investimentu fó hatene kona-ba oportunidade sira no knaar husi TradeInvest Timor-Leste

Konferénsia Internasionál kona-ba Investimentu iha Timor-Leste hahú iha loron-domingu ne’e (loron 5 fulan-juñu) kalan, no kontinua fali iha loron-segunda no loron-tersa, ho programa lubuk boot ida ne’ebé iha objetivu atu hatudu potensiál Timor-Leste nian iha área negósiu nian balu. Governu Timor-Leste no empreza Aaustrália nian, hanaran Informa, ne’ebé mak organiza konvensaun sira ne’e, hateten sira serbisu hamutuk ona hodi asegura reprezentasaun nivel aas ida, no Ajénsia kona-ba Promosaun Investimentu no Esportasaun Governu nian – TradeInvest Timor-Leste fasilita partisipasaun empreza, ajénsia no investidór sira. Parseiru potensiál sira iha área negósiu nian maihusi mundu tomak atu partisipa iha Konferénsia privada ne’e, no tuir lista ne’ebé iha, persentajen boot liu husi delegadu sira ne’ebé partisipa, maihusi Austrália no nasaun sira ASEAN nian.

Ministru Planeamentu no Investimentu Estratéjiku, Kay Rala Xanana Gusmão, sei marka prezensa iha sesaun boazvindas nian, iha domingu kalan.Prevee ona katak Primeiru-Ministru, Rui Maria de Araújo, loke ofisiálmente konferénsia ne’e, iha segunda dadeer, tuku 9:00. Ministru Estadu, Koordenadór Asuntu Ekonómiku no Ministru Agrikultura no Peska, Estanislau da Silva, sei halo diskursu ikus nian, iha loron 7, iha parte loro-kraik.

Entre kolaboradór timoroan sira seluk, sira ne’ebé partisipa maka Diretór Ezekutivu TradeInvest, Arcanjo da Silva, Prezidente Timor GAP, Francisco Monteiro, Diretór sira husi Autoridade Nasionál Petróleu no Minerál (ANPM) no Prezidente Kámara Komérsiu Timor-Leste, Oscar Lima. Prezidente Zona Espesiál Ekonomia Sosiál Merkadu Oekusi nian, Mari Alkatiri, sei halo aprezentasaun ida kona-ba projetu sira ne’ebé daudaun ne’e hala’o hela.

Entre vizitante sira, sira ne’ebé partisipa maka Vise-Ministru Governu Territóriu Norte Austrália nian, Peter Styles, Embaixadór Austrália nian iha Timor-Leste, Peter Doyle no emprezáriu no organizasaun oioin, inklui Banku ANZ, Banku Dezenvolvimentu Aziátiku, AICEP-Portugal, ANL Container Line, Konselu Emprezariál Austrália/Timor-Leste nian, Grupu Bollore, Conoco Phillips, Ernst and Young Portugal, Korporasaun Finanseira Internasionál, SDV, USAID no organizasaun World Fish.

Iha konferénsia ne’e, sei fahe istória kona-ba investimentu sira ne’ebé estabelese ona no hirak ne’ebé foin mosu, ho aprezentasaun husi parte TL Cement, Heineken ÁZia-Pasífiku no Jape Group InternaCional.

Tema balun ne’ebé atu aprezenta maka hanesan dezenvolvimentu husi esplorasaun mina-rai no potensiál esplorasaun minerál iha Timor-Leste, perspetiva sira kona-ba investimentu no atividade ekonómika, partisipasaun iha merkadu sira ne’ebé foin mosu, konstrusaun infrastrutura ho kualidade no setór finanseiru no investimentu nian.

Organizadór, TradeInvest Timor-Leste, hein ho interese Konferénsia ne’e, ne’ebé ajénsia ne’e haree hanesan kontributu importante ida ba objetivu husi promosaun investimentu no ba esportasaun sira iha Timor-Leste. Ajénsia ne’e, harii servisu “one-stop” [sentralizasaun husi formalidade legál sira iha servisu ida de’it] atu investidór no esportadór lokál sira no rai-li’ur no ajénsia ne’e maka sai responsavel ba prosedimentu administrativu sira ne’ebé envolve atubele fó Sertifikadu Investimentu nian, Sertifikadu Esportadór nian sira no Akordu Espesiál Inventimentu nian sira. Governu Timor-Leste disponibiliza insentivu signifikativu ba investidór kualifikadu sira, ne’ebé liuhusi livre impostu no liuhusi direitu no garantia sira ne’ebé buka atu asegura ambiente ida ne’ebé di’ak ba investimentu.

Sei marka prezensa iha Konferénsia ne’e, meiu komunikasaun internasionál oioin, ne’ebé maka sei halo kobertura kona-ba eventu ne’e no habelar informasaun sira kona-ba oportunidade investimentu nian sira iha Timor-Leste.

Portavós Governu Konstitusionál VI, Ministru Estadu Agio Pereira, hatete katak “investimentu internasionál no parseria negósiu sira fundamentál ba ekonomia ida ne’ebé diversifikada no sustentavel iha Timor-Leste. Governu, liuhusi ninia pakote reforma ekonómika no liuhusi ajénsia sira hanesan TradeInvest Timor-Leste, to’o oras ne’e hadi’a nafatin ambiente negósiu nian no hatudu nafatin oportunidade sira ne’ebé iha ba emprezáriu nasionál no internasionál sira. Governu felisita emprensa Informa Austrália no TradeInvest Timor-Leste nian ba esforsu hirak ne’ebé dezenvolve ona atu Konferénsia Internasionál Investimentu bele la’o”.REMATA