Ministru Obras Públikas, Transportes no Komunikasaun, Gastão de Sousa, reprezenta Primeiru-Ministru,  inaugura edifísiu foun Koléjiu Fatumaka, Baukau, iha loron 24 fulan-maiu tinan 2016.

Edifísiu foun ne’e kompostu husi, sala Diretór, Vise-Diretór, Sekretáriu, sala aula ba segundu ano ho terseiru anu, sala komputadór, bibleoteka, sala dezeñu mekánika no sala dezeñu marsenaria.

Ministru Gastão de Sousa iha nia diskursu hateten, edukasaun maka setór ne’ebé prioritáriu tebes. Igreja, tuir ministru, hanesan Governu nia parseiru dezevolvimentu, liu-liu iha setór edukasaun.

Diretór Koléjiu Fatumaka, Pe. Anacleto Pires, hato’o agradesimentu ba Governu RDTL ba kolaborasaun atu harii edifísiu foun ne’e.  “Ami promete no garante sei  tau-matan no uza didi’ak  edifísiu ida-ne’e, hodi eduka estudante sira ba Timor-Leste nia futuru no Uma Kreda Timór nian,” Pe. Anacleto Pires dehan.

Tuir dadus, tinan-tinan númeru estudante foun to’o  na’in 400. Husi numéru ne’e, hafoin liuhusi selesaun, simu de’it ema na’in 80 to’o 85, fahe ba departamentu haat, tanba laiha fasilidade ne’ebé natonba estudante barak. Fasilidade sira ne’ebé mínimu liu maka dormitóriu ka fatin toba nian, sala aula limitadu, ofisina ba prátika mós limitadu no limitasaun rekursu umanu, liu-liu profesór sira. Maske nune’e, garante katak, maioria munisípiu iha Timor laran, iha nia reprezentante estudante ida.

Koléjiu Fatumaka mós tau-matan ba eskola Ensinu Báziku ho nia filiál, akomoda estudante besik rihun rua. Koléjiu ida ne’e mós loke ba aspirante no novisiadu ho objetivu atu fó formasuan ba foin-sa’e  sira, ne’ebé iha vokasaun atu sai relijiozu salezianu hodi kontinua obra misaun saleziana iha Timor-Leste.

Koléjiu ne’e mós fó asisténsia sosiál, pastorál  no espirituál ba populasuan ka sarani sira iha zona Fatumaka husi tempu koloniál to’o agora.

Marka Prezensa iha Inaugurasaun ne’e, Vise-Ministru Obras Públikas, Transportes no Komunikasaun, Januário Pereira, Bispu Dioseze Dili, Dom Virgílio do Carmo da Silva, Koordenadór ba Apoiu Sosiedade Sivíl, Joaquim da Costa Freitas no sarani sira iha Fatumaka.