Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 3 fulan-juñu tinan 2016

Governu Timor-Leste aprezenta kondolénsia ba Mohamed Abdelaziz ninia mate no hato’o solidariedade ba povu saarauí nian

Governu Timor -Leste hato’o nia kondolénsia ba Mohamed Abdelaziz, Prezidente Repúblika Árabe Saarauí Demokrátika nian no dirijente prinsipál ne’ebé luta ba autodeterminsaun husi povu saarauí  ninian mate. Abdelaziz mate iha tersa, loron 31 fulan-maiu, tanba sofre kankru, molok atu bele marka prezensa iha autodeterminasaun povu Saara Osidentál ninian, ne’ebé maka funu ona durante tinan 41.

Governu afirma fila-fali ninia solidariedade ba povu saaruí, ne’ebé mai husi partilla iha luta tinan barak nia laran. Iha tinan 2002 prezidente Abdelaziz vizita Timor-Leste no deklara katak “Povu Timor-Leste no Povu Saara Osidentál hanesan ‘povu kaduak’ , ne’ebé hetan terus hanesan, ho sakrifísiu sira ne’ebé boot, hodi tuba no luta hamutuk ba sira-nia direitu atu  hetan respeitu husi ninia viziñu espansionista sira”.

Timor-Leste estabelese kedas relasaun diplomátika sira ho Repúblika Árabe Saarauí Demokrátika hafoin hetan ninia ukun rasik an. Iha okaziaun Timor-Leste hetan aseitasaun hanesan membru Nasoins Unidas nian, Kay Rala Xanana Gusmão, nu’udar Prezidente iha tempu ne’ebá, apela ba “replikasaun husi implementasaun planu Nasoins Unidas nian ba referendu ida kona-ba autodeterminasaun ba Saara Osidentál”, hodi dehan katak “so votasaun ida ne’ebé demokrátika, justa no livre, hanesan ho ida ne’ebé hala’o iha Timor-Leste, maka bele halo hakotu situasaun la justu ne’e”. Referendu ne’e, ne’ebé ninia pedidu hato’o hela de’it iha rezolusaun oin-oin ONU nian, seidauk iha nafatin determinasaun ida kona-ba bainhira maka atu hala’o.

Timor-Leste rekoñse reprezentasaun diplomátika kompleta ba Embaixada ‘Repúblika Saarauí’, nian iha tinan 2010, iha Dili, no kontinua habelar luta povu Saara Osidentál nian. Iha fulan-setembru liubá, iha Asembleia Jerál Nasoins Unidas nian, Primeiru-Ministru, Rui Maria de Araújo, fó hanoin fila-fali tan katak “povu saarauí (…) kontinua haree sira-nia direitu fundamentál sira ema nega nafatin”

Portavós Governu Konstitusionál VI nian, Ministru Estadu Agio Pereira, hateten katak “iha okaziaun Prezidente Mohamed Abdelaziz exxedine ninia mate, ami aprezenta ami-nia kondolénsia no hato’o ami-nia solidariedade, ne’ebé forte no rohan-laek, ba povu Saara Osidentál, ba sira-nia luta atu ukun-rasik an”.