………………………………………………………………………………………………………………
Díli, loron 31 fulan-maiu tinan 2016
Komunikadu Imprensa
Sorumutuk Konsellu Ministrus nian iha loron 31 fulan-maiu tinan 2016
Konsellu Ministrus hala’o sorumutuk loron-tersa ne’e, iha Palásiu Governu, iha Dili, no aprova ona:
1. Rezolusaun Governu nian kona-ba farda Funsaun Públika nian
Deside hili a farda ida Funsaun Públika nian, hodi uza iha loron nasionál no serimónia ofisiál sira, ninia objetivu mak atu dignifika serbisu Administrasaun nian, hatudu espíritu nasionalizmu nian ida ne’ebé boot no kontribui ba dezenvolvimentu espíritu korpu nian entre ninia traballadór sira. Rezolusaun ne’e iha intensaun mós atu prezerva no habelar patrimóniu istóriku-kulturál husi padraun sira Tais nian (hena tradisionál timór nian), ne’ebé daudaun ne’e tama ona iha modelu foun sira.
Modelu sira farda nian ne’ebé aprezenta ona, ekipa téknika ida maka halo estudu no aprova. Ekipa ne’e kompostu husi Diretór-Jerál sira, Diretór Nasionál sira, Xefe Departementu sira husi instituisaun lima – Komisaun Funsaun Públika, Ministériu Turizmu, Arte no Kultura no Sekretaria Estadu ba Apoiu no Promosaun Sósiu-Ekonómika Feto nian, Sekretaria Estadu ba Juventude no Desportu no mós Sekretaria Estadu Arte no Kultura.
2. Alterasaun daruak ba Dekretu-Lei n. 27/2008 kona-ba Rejime Jerál husi Karreira sira Administrasaun Públika nian
Diploma ne’e halo adaptasaun filafali ba saláriu sira husi traballadór sira husi Karreira Rejime Jerál Funsaun Públika nian, ne’ebé la halo atualizasaun durante tinan 7 liu ona.
Aliñamentu filafali ba Karreira Rejime Jerál nian ne’e ninia objetivu mak atu evita iha rejime espesiál karreira bara-barak ne’ebé la presiza, tanba bele estraga armonia husi sistema Funsaun Públika nian.
Reforma Administrasaun Públika ne’ebé determina hosi Programa Governu ninia objetivu ida entre objetivu sira seluk maka, hasa’e profissionalizmu no produtividade Funsaun Públika nian. Produsaun lejizlasaun foun, ne’ebé hahú ho alterasaun ba Rejime Jerál Karreira sira nian, konsidera mós aprovasaun ba kontribuisaun ba rejime pensaun sira no reforma nian.
Númeru kargu diresaun no xefia ne’ebé aumenta iha administrasaun Públika ezije mós kriasaun rejime foun ida ba komisaun servisu nian sira, ne’ebé tama iha rejime rasik ida, tamba ne’e revoga dispozisaun sira uluk ne’ebé trata kona-ba diresaun no xefia sira.
3. Dekretu-Lei kona-ba Rejime Kargu Diresaun no Xefia nian iha Administrasaun Públika
Administrasaun Públika Timor-Leste, tanba ninia dimensaun no kompleksidade, ezije kriasaun regra rasik sira ba exersísiu kargu sira diresaun no xefia nian. Kargu sira iha komisaun servisu nian, to’o oras ne’e , regula iha ámbitu Karreira Rejime Jerál nian. Daudaun ne’e deside ona, atu fahe rejime sira, atu estabelese rekizitu espesiál balun ba ezersísiu lideransa nian.
Diploma ida ne’e kria kuadru kona-ba kompeténsia pesoál nian hirak ne’ebé mak ezije ba kandidatu sira ba kargu diresaun no xefia nian. Regulamenta mós kondisaun sira ba hafoun no hapara komisaun servisu nian sira, hodi asegura kondisaun sira serbisu nian ne’ebé di’ak liu ba funsionáriu sira.
Konsellu Ministrus mós analiza ona:
1. Rejime Kareira Profisionál ba Seniór sira iha Administrasaun Públika
Komisaun Funsaun Públika propoin introdusaun karreira espesífika ida ba profisionál seriór sira [husi topu], ne’ebé, haree husi kualifikasaun no esperiénsia ne’ebé sira iha, bele tama ba-iha kuadru rasik ida.