Esforsu sira Timor-Leste nian hetan prémiu iha Loron Mundiál La-Fuma Tabaku
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 31 fulan-maiu tinan 2016
Esforsu sira Timor-Leste nian hetan prémiu iha Loron Mundiál La-Fuma Tabaku
Ohin, loron 31 fulan-maiu, hanesan Loron Mundiál La-fuma Tabaku. Organizasaun Mundiál Saúde nian promove loron ida ne’e atu koa’lia liu kona-ba impaktu negativu sira ba saúde husi fuma tabaku no atu fó prémiu ba ema no organizasaun sira ne’ebé maka koñesidu ho sira-nia esforsu atu fó kontribuisaun hodi hamenus konsumu tabaku nian.
Primeiru-Ministru, Rui Maria de Araújo, ohin hato’o mensajen ida liuhusi televizaun ba nasaun, hanesan parte husi kampaña ida ne’ebé maka hala’o hela, hodi tau atensaun liubá uzu tabaku nian ne’ebé maka’as iha Timor-Leste. Iha realidade, iha nasaun ne’e “iha ema mane hamutuk porsentu 70 no foin-sa’e sira ho tinan 13 to’o 15hamutuk porsentu 42 maka fuma tabaku”. Iha ninia mensajen, Xefe Governu nian hatete katak atu hamenus hahalok fuma tabaku nian “importante ba futuru nasaun nian, tanba impaktu kona-ba saúde povu timoroan nian”.
Governu lansa ona kampaña ida iha televizaun no iha rádiu ne’ebé aviza kona-ba perigu sira husi fuma tabaku no fó motivasaun ba fumadór sira atu hapara hahalokne’e. Iha ona pesoál médiku ne’ebé hetan ona formasaun atu tulun ema sira atu husik fuma tabaku. Iha sorin seluk, lejislasaun bandu publisidade ba tabaku, fuma tabaku iha fatin públiku ne’ebé maka taka tomak no fa’an produtu kona-ba tabaku nian ba otas ki’ik sira.
Nu’udar rekonesimentu ba medida sira ne’ebé atu promove Timor-Leste saudavel ne’e, Organizasaun Mundiál Saúde (OMS) fó premiu iha tinan ida ne’e, iha rejiaun Sudeste Aziátiku, ba Primeiru-Ministru Timor-Leste nian, Rui Maria de Araújo. Reprezentante OMS nian iha Timor-Leste, Dra. Rejesh Pandav, konsidera katak lideransa Xefe Ezekutivu nian kona-ba kestaun ida ne’e hanesan “ezemplu ida ba nasaun sira seluk ne’ebé iha hela faze dezenvolvimentu nia laran”. Primeiru-Ministru hetan tiha ona nomeasaun ba prémiu husi Health Alliance International.
Portavós Governu Konstitusionál VI nian, Ministru Estadu Agio Pereira, reforsa tan ideia katak “konsekuénsia sira husi konsumu tabaku nian ne’ebé aas ba saúde, iha Timor-Leste, labele husik liu. Ba ita-nia dezenvolvimentu no atu harii futuru ida ne’ebé saudavel ba foin-sa’e sira iha ita-nia nasaun, medida atu hamenus konsumu tabaku nian importante tebes-tebes. Hanesan Primeiru-Ministru temi tiha ona iha ninia mensajen iha televizaun ohin, ema tenke husik konsumu tabaku, tamba sira prekupa ho sira-nia saúde rasik no saúde Nasaun nian”. REMATA
