Primeiru-Ministru partisipa iha Forum Ekonómiku Mundiál kona-ba ASEAN, iha Malázia
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 30 fulan-maiu tinan 2016
Primeiru-Ministru partisipa iha Forum Ekonómiku Mundiál kona-ba ASEAN, iha Malázia
Primeiru-Ministru, Rui Maria de Araújo, sei partisipa iha Forum Ekonómiku Mundiál kona-ba ASEAN, ne’ebé sei hala’o iha Kuala Lumpur (Malázia), iha loron 1 no 2 fulan-juñu. Envolvimentu ativu husi Xefe Ezekutivu timoroan nian ne’e hatudu kompromisu Timor-Leste nian iha fortalesimentu kooperasaun públiku-privada, no mós empeñu ekonómiku país nian iha rejiaun ne’e. Organizadór sira hatete katak Forum ne’e hanesan “plataforma ideál ba desizór sira husi nivel leten-aas nian (desizór sira husi topu), ne’ebé mai husi setór oin-oin, bele prodús kolaborasaun ida ne’ebé boot liután entre atividade ekonómiku, governu no sosiedade sivil, no hasoru dezafiu rejionál sira”.
Iha loron-kuarta (loron1 fulan-juñu), Primeiru-Ministru, hamutuk ho nia omólogu Kamboja nian, Samdech Techo Hun Sen, sei halo “observasaun espesiál sira”, iha sesaun ida kona-ba “Integrasaun finanseira iha kontestu Ázia-Pasífiku nian”, molok partisipa iha sorumutuk ida kona-ba “Aprende ho ema ne'e bé buat hatene liu kona-ba infraestrutura ASEAN nian”. Iha abertura plenáriu Forum ne’e nian, Primeiru-Ministru Rui Maria de Araújo hamutuk ho Xefe Governu Kamboja nian no ho Vise-Prezidente sira husi Indonézia no Vietname nian, atu hala’o debate kona-ba “Elaborasaun Ajenda ASEAN nian ba inkluzaun no kreximentu”. Tuirmai, Primeiru-Ministru partisipa iha Sorumutuk Informál ida entre Lider Ekonómiku Mundiál sira (inisiativa Forum Ekonómiku Mundiál ne’ebé tinan-tinan halibur lideransa sira husi área oin-oin iha sorumutuk informál no fexada sira).
Iha loron 2 fulan-juñu (kinta-feira) hahú ho eventu ida ho naran ”Fundasaun sira halibur-malu ho Lider: Primeiru-Ministru Rui Maria de Araújo” iha ne’ebé membru sira husi Young Globál Leaders, husi Global Shapers no husi Schwab Foundation Social Entrepreneurs sei halo debate ho Primeiru-Ministru kestaun sira kona-ba lideransa no kona-ba Timor-Leste. Tuir fali mai, iha Primeiru-Ministru halo diskursu iha sesaun abertura husi “Vizaun Japaun no nasaun sira seluk nian ba ASEAN”.
Durante viajen ne’e tomak, tau ona iha ajenda sorumutuk lubuk ida ne’ebé inklui sorumutuk bilaterál ida ho Vise-Primeiru-Ministru Vietname nian, Trinh Dinh Dung. Bainhira fila Primeiru-Ministru sei halo mós vizita kortezia ida ba nia omólogu Singapura nian, Lee Hsien Loong.
Portavós Governu Konstitusionál VI nian, Ministru Estadu Agio Pereira konsidera katak “Primeiru-Ministru nia partisipasaun iha Forum Ekonómiku Mundiál kona-ba ASEAN ne’e hanesan sinál di’ak ida katak Timor-Leste kompromete an ona atu sai nu’udar partisipante ativu ida iha rejiuan ne’e. Ko’alia liu kona-ba kreximentu ekonómiku, iha koordenasaun no iha ASEAN, Fórum ne’e sai nu’udar binan ida ne’ebé di’ak tebes atu kria ligasaun sira no atu hetan esperiénsia sira ne’ebé maka sei tulun país ne’e iha ninia objetivu atu harii ekonomia diversifikada no sustentavel ida iha Timor-Leste”.
Primeiru-Ministru, tuir previzaun, sei to’o iha Dili, iha sábadu, loron 4 fulan-juñu.
