Governu Timor-Leste

Sorumutuk Ministeriál CPLP nian hirak ne’ebé hala’o remata ona

Sorumutuk VII Ministru sira Siénsia, Teknolojia no Ensinu Superiór husi Komunidade Nasaun Lian Portugés (CPLP sigla iha lian portugés) marka ona ohin (loron 25 fulan-maiu) nu’udar loron ikus husi sorumutuk nivel aas lubuk ida, ne’ebé konvoka iha Dili no hala’o tiha ona durante semana tolu ikus ne’e. Iha mós semana ida ne’e, hala’o  semináriu internasionál ida kona-ba “Polítika sira  Edukasaun no Investigasaun Sientífika iha Estadu-membru sira CPLP nian” no Sorumutuk IX Ministru Edukasaun sira CPLP nian.

Iha semana liubá, iha abertura Sorumutuk Ordinária III Ministru Asuntu Tasi nian sira husi CPLP, Primeiru-Ministru, Rui Maria de Araújo, haree katak ba Timor-Leste, sai nu’udar uma-na’in ba sorumutuk hirak ne’e sai hanesan ksolok boot ida no nia agradese ba “ilustre ministru  sira husi nasaun CPLP nian sira seluk, nune’e mós ba sira-nia reprezentante sira husi delegasaun partisipante sira ne’e rasik”.

Iha loron 19 fulan-maiu, hala’o Sorumutuk XVII Ministru Defeza sira CPLP nian, iha loron 10 fulan hanesan, hala’o sorumutuk nivel aas nian ida kona-ba Jéneru no sorumutuk téknika oioin. Sekretáriu Ezekutivu CPLP nian, Embaixadór Murade Murargy, hela iha Dili husi loron 15 to’o loron 26 fulan-maiu nian, atu partisipa iha sorumutuk sira, no iha loron 20 fulan ne’e nian, simu kondekorasaun ho kategoria Orden Timor-Leste nian, nu’udar rekoñesimentu ba ninia kontributu atu habelar valór universál sira ne’ebé hatuur iha orijen CPLP nian.

Tema ne’ebé mak Timor-Leste hili ba ninia mandatu iha Prezidénsia ne’e maka “CPLP no globalizasaun”. Aspetu fundamentál ida, ne’ebé Primeiru-Ministru, Rui Maria de Araújo, temi mak introdús“ dinámika ekonómika no emprezariál foun ida, iha ne’ebé projeta ita-nia potensiál, la’os de’it entre Estadu-membru sira, maibé mós entre ita-nia parseiru sira no ho ita-nia parseiru sira”. Susesu husi Forum Ekonómiku Mundiál Dahuluk CPLP nian, ne’ebé hala’o iha Dili iha fulan-fevereiru tinan ne’e nian, sai hanesan sasin ida katak tema ida ne’e atrativu.

Portavós Governu Konstitusionál VI, Ministru Estadu Agio Pereira, louva ema hotu ne’ebé envolve iha organizasaun sorumutuk sira ne’ebé hala’o foin lalais ne’e no rejista knaar “Timor-Leste nian nu’udar Prezidente CPLP, iha promosaun ligasaun sira ne’ebé besik liután ho ita-nia belun sira husi Estadu-membru sira”. Agio Pereira esplika mós katak “ho membru sira CPLP nian ne’ebé namkari iha kontinente haat no tama iha komunidade rejionál oioin, iha nafatin potensia boot ida iha kontinuidade husi ita-nia kooperasaun, ne’ebé maka dezenvolve ho forma ida ne’ebé efikás iha tinan rua ikus ne’e”. REMATA