Sorumutuk Konsellu Ministrus nian iha loron 24 fulan-maiu tinan 2016
Prezidénsia Konsellu Ministrus
VI Governu Konstitusionál
..............................................................................................................................
Díli, loron 24 fulan-maiu tinan 2016
Komunikadu Imprensa
Sorumutuk Konsellu Ministrus loron 24 fulan-maiu tinan 2016
Konsellu Ministrus hala’o sorumutuk iha tersa-feira ne’e, iha Palásiu Governu, iha Dili, no aprova ona:
1. Dekretu-Lei kona-ba Rejime Gabinete Ministeriál nian sira
Diploma ne’e atualiza kompozisaun, orgánika no rejime gabinete sira membru Governu nian, oinsá atu bele implementa di’ak liu ninia estrutura apoiu nian ida, inklui mós estrutura sira Gabinete Primeiru-Ministru nian ne’ebé maka seidauk regulamenta.
Regra sira rekrutamentu maundobra nian ne’ebé hetan kualifikasaun ba gabinete sira membru Governu nian mós kontempla ona, liuhusi rekursu ba kuadru sira funsaun públika nian ka ba kontratu sira ne’ebé ho termu sertu, hodi mantein elementu konfiansa pesoál ne’ebé tenke orienta nomeasaun membru gabinete nian sira.
2. Dekretu-Lei ne’ebé kria Autoridade Inspesaun no Fiskalizasaun Atividade Ekonómika, Sanitária no Alimentár, IP
Diploma ne’e kria Autoridade Inspesaun no Fiskalizasaun Atividade Ekonómika, Sanitária, Alimentár, ho kompeténsia atu halo Inspesaun no Fiskalizasaun Atividade Ekonómika sira, kondisaun sanitária sira no kontrolu kualidade ai-han nian sira.
Fó autoridade no kompeténsia ba institutu públiku ne’e atu organiza prosesu kontraordenasaun no aplika multa no sansaun sira, karik halo violasaun ba lei, no mós atu promove asaun sira ba divulgasaun informasaun relevante nian sira, ho objetivu atu hamenus, halakon ka previne risku hirak ne’ebé hetan iha kadeia alimentár no risku sanitáriu ba saúde públika. Ho atividade ida ne’e, hakarak mós atu asegura ezersísiu regular atividade ekonómika sira iha setór alimentár no la’ós alimentár, hodi taumatan ba konsumidór sira no ba ekonomia nasionál.
Medida ne’e kumpre prioridade ida husi prioridade sira seluk Programa Governu nian, ne’ebé prevee relansamentu polítika defeza konsumidór nian no hadi’a kondisaun moris populasaun nian, aleinde regula atividade ekonómika sira.
3. Dekretu-Lei kona-ba regra relativa sira ba asesu no klasifikasaun dokumentu ofisiál sira
Diploma ne’e estabelese regra relativa sira ba asesu públiku ba dokumentu ofisiál sira no ninia klasifikasaun, kona-ba konfidensialidade. Estabelese ona krtitéria sira ne’ebé hanesan kona-ba relasionamentu entre entidade públika nian sira no poténsia interesadu sira hodi simu informasaun ofisiál nian sira, ho objetivu hodi taumatan ba asuntu sira ne’ebé mak iha koñesimentu indiskriminadu bele afeta interese Estadu nian.
Konsellu Ministrus mós analiza ona:
1. Aprezentasaun tetu fiskál ba tinan 2017
Ministériu Finansas aprezenta ona ba Konsellu Ministrus senáriu oioin kona-ba ezekusaun orsamentál ba tinan 2017, haree ba-iha projetu sira iha ezekusaun, projetu foun no kontinjénsia sira ne’ebé posivel. Senáriu hirak ne’ebé aprezenta ona ho objetivu atu orienta ministériu sira kona-ba elaborasaun ba sira nia planu anuál no ninia orsamentu, nune’e hodi define valór ba atribuisaun ba proposta Orsamentu Jerál Estadu nian ba tinan finanseiru oin mai.
Aprezentasaun ne’e mosu tuir Jornada Orsamentál sira nian, ne’ebé hala’o iha loron 16 fulan-maiu, iha Ministériu Negósius Estranjeirus no Kooperasaun. Iha ne’ebá sira halibur membru sira husi Parlamentu Nasionál no Governu, diretór-jerál sira, diretór nasionál sira, kuadru superiór sira seluk Estadu nian no funsionáriu sira empreza públika nian no organizmu autónomo sira , hodi prepara Orsamentu Estadu nian ba tinan 2017.
Iha elaborasaun orsamentu ba tinan oin-mai, ne’ebé sei haree ba fatór oioin, liuliu ba Planu Estratéjiku Dezenvolvientu (PED), Programa Governu, ezekusaun orsamentál, inflasaun, sustentabilidade fiskál no objetivu sira Dezenvolvimentu Sustentavel husi Ajenda Nasoins Unidas nian ba Dezenvolvimentu Sustentavel to’o tinan 2030, ne’ebé adota husi Parlamentu Nasionál iha fulan-setembru tinan kotuk liubá.
2. Relatóriu kona-ba progresu no verifikasaun despeza komunikasaun sira Governu nian
Relatóriu ne’e, aprezenta husi Ministériu Finansas, ne’ebé koa’lia kestaun sira kona-ba tusan ne’ebé aumenta husi servisu ministeriál oioin ba Timor Telecom, haree ba orientasaun no rekomendasaun nian sira husi Konsellu Ministrus nian atu haree didi’ak fali tusan sira ne’e.
3. Aprezentasaun relatóriu anuál husi Timor Gap,EP
Timor Gap,EP, entrega formalmente ona ba Governu, Relatóriu no Konta sira tinan 2015 nian, tuir lei no ho norma internasionál sira kona-ba elaborasaun relatóriu finanseiru nian sira.
Prezidente empreza públika ne’ebá nian, Francisco Monteiro, aprezenta ona ba Konsellu Ministrus dadus detalladu kona-ba atividade prinsipál sira ne’ebé dezenevolve ona iha tinan 2015, hanesan atividade petrolífera sira iha Tasi Timor nian. Montante (“upstream”-esplorasaun no produsaun), kontinua dezenvolve peskiza sira iha Área Dezenvolvimentu Petrolíferu Konjuntu, hahú ona estudu sira iha Área Eskluziva Timor-Leste nian, inklui levantementu 3D dadus sísmiku sira, no ezekuta ona revizaun husi rezerva Greater Sunrise no Bayu-Udan nian. Jusante (“downstream”-[Iha parte okos] - transporte, refinasaun no distribuisaun), kontinua dezenvolvimentu emprezariál no jestaun projetu, liuliu ba postu abastesimentu kombustivel sira iha Suai.
Atividade sira seluk inklui kontinuasaun jestaun no administrasaun projetu Tasi Mane; dezenvolvimentu korporativu no profisionál, liuliu ba formasaun rekursu umanu sira; no projetu esplorasaun Greater Sunrise.
Iha fulan ida ne’e, dokumentu sei entrega ba Tribunál Kontas, hamutuk ho auditoria ne’ebé maka halo husi empreza independente, hodi nune’e iha fulan-juñu, Relatóriu bele fó sai ba públiku sira.
4. Rekerimentu ba Kámara Kontas iha ámbitu rekursu nian sira kona-ba desizaun ikus vistu nian ba kontratu empréstimu no ba kontratu ezekusaun ba obra bee dalan iha sidade Dili
Governu analiza tiha ona prosesu rua ne’e, iha tránzitu iha Tribunál Rekursu nian, ne’ebé sira entrega ona ba rekursu sira kona-ba desizaun ikus hodi rekuza vistu préviu Kámara Kontas nian ba kontratu empréstimu no kontratu ezekusaun obra sira kona-ba bee dalan Dili nian, liu ona loron 50, maibé seidauk hetan kualkér resposta husi parte Tribunál nian.
La hatan ho vistu ba empréstimu ne’e, Governu labele ezekuta kontratu empréstimu ho juru preferensiál nian sira atu finansia obra infraestrutura sira ba bee dalan husi bee mota nian sira iha kapitál país nian. La hatan ba vistu kontratu ezukusaun obra sira nian impede Governu atu hala’o obra sira bee dala nian, ne’ebé importante tebes hodi kontrola bee nalihun ne’ebé bele haree tuir ninia siklu iha sidade laran.
Bainhira Governu seidauk hetan nofikasaun kona-ba distribuisaun prosesu sira ne’e ba juíz responsávél sira, Konsellu Ministru konsidera aprezenta reklamasaun ba Prezidente Tribunál Rekursu nian ba falta ka irregularidade kona-ba distribuisaun sira ne’e.
5. Prezidénsia rotativa CPLP [Komunidade País sira Lia-Portugés] nian
Konsellu Ministru analiza ona dezenvolvimentu husi atividade sira ne’ebé mak hala’o hela, iha ámbitu prezidénsia rotativa Komunidade País sira Lia-Portugés nian.
