Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 19 fulan-maiu tinan 2016

Projetu TL Cement avansa ho asinatura Akordu Espesiál Investimentu nian

Projetu TL Cement hela tan hakat ida atu realiza, bainhira Governu Timor-Leste asina Akordu Espesiál Investimentu nian ida ho empreza ne’e,  iha tersa kalan loron 17 fulan-maiu.

Iha serimónia asinatura nian, ne’ebé realiza iha Otél Ramelau, iha Dili, Ministru Estadu Koordenadór Asuntu Ekonómiku nian, Estanislau da Silva, esplika katak Governu kolabora ho projetu ne’e liuhusi asinatura Akordu Investimentu Espesiál ida no asinatura “karta intensaun sira ne’ebé la vinkula” nian ida, atu marka katak, iha futuru, Governu bele partisipa iha projetu ne’e.

Ministru Estadu ne’e dehan katak medida hirak ne’e hato’o mensajen katak “Governu hakarak haree fábrika simentu nian ida ne’e hamriik no bele karik lais liután!”

Diretór TL Cement nian, James Rhee, hato’o ninia haksolok ho akordu no ho projetu Baukau nian ne’e, ne’ebé sei lori benefísiu substansiál sira ba Timor-Leste, inklui oportunidade formasaun, impostu, no “royalties”  no estimativa ida kona-ba empregu hamutuk 650 ba tempu tomak nian.

Fábrika simentu ne’e sei harii besik zona luan ida ne’ebé nakonu ho ahu-ruin (kalkáriu) ho kualidade aas iha rejiaun Baukau nian, no sei halo produsaun ba simentu iha faze báziku fábrika nian (clínquer) ba  esportasaun no simentu ba abastesimentu konstrusaun sivíl iha Timor-Leste. Komunidade lokál maka sei sai benefisiáriu dahuluk husi projetu ne’e, liuhusi konstrusaun unidade formasaun nian ida. Benefísiu sira ba tempu naruk sei aprezenta bainhira Governu hahú ona serbisu ho empreza ne’e no hodi garante kontratasaun traballadór sira iha munisípiu hotu-hotu Timor-Leste nian.

Projetu TL Cement ne’e abranje objetivu boot tolu Governu nian kona-ba reforma ekonómika sira: aumenta investimentu privadu, promove diversifikasaun ekonómika no promove empregu sustentavel. Iha serimónia  ne’e, asina ona mós sertifikadu investimentu nian ho L & S Unipessoal (otelaria), ho Palm Spring Hotel Lda. no ho Stamford Medical Lda.

Portavós Governu Konstitusionál VI nian, Ministru Estadu Agio Pereira, hatudu nia laran-haksolok ba avansu husi projetu TL Cement nian no hateten katak ”susesu projetu ne’e nian sei fó sinál pozitivu ba investidór estranjeiru sira seluk, hodi aumenta konfiansa katak Timor-Leste sai hanesan fatin ne’ebé di’ak hodi halo negósiu”. REMATA