Timor-Leste sai uma-na’in ba Konferénsia Internasionál kona-ba Fronteira Tasi nian sira no Direitu ba Tasi
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 18 fulan-maiu tinan 2016
Timor-Leste sai uma-na’in ba Konferénsia Internasionál kona-ba Fronteira Tasi nian sira no Direitu ba Tasi
Espesialista prinsipál balun kona-ba Fronteira Tasi nian no Direitu ba Tasi hasoru malu iha Timor-Leste atu partisipa iha konferénsia internasionál, ne’ebé sei hala’o aban iha Sentru Konvensaun Dili.
“Konferénsia Internasionál Dili: Fronteira Tasi nian sira no Direitu ba Tasi” ne’e Gabinete Fronteira Tasi Timor-Leste nian maka organiza no ninia objetivu maka atu sensibiliza importánsia husi Direitu ba Tasi no papél tribunál internasionál sira nian atu rezolve ho dalan dame nian disputa sira ne’ebé mosu. Eventu ne’e hala’o iha loron aniversáriu darua-nuluk husi kriasaun Tribunál Internasionál Direitu ba Tasi [sigla iha lia-inglés: ITLOS], ne’ebé Nasoins Unidas harii iha tinan 1996, no sei konta ho prezensa husi Prezidente atuál ITLOS nian, Juíz Vladimir Golitsyn.
Liutiha abertura konferénsia ne’e nian, ne’ebé Primeiru-Ministru, Rui Maria de Araújo, maka sei halo, Prezidente ITLOS sei halo ninia diskursu. Prevee ona painél debate nian rua: ida uluk, Ministru Estadu Dionísio Babo Soares, maka sei modera no sei ko’alia kona-ba “Perspetiva Globál sira kona-ba Fronteira Tasi nian sira”, inklui Prezidente Golitsyn [Rúsia], Profesór Vaughan Lowe QC [Reinu Unidu] no Embaixadór Eddy Pratomo [Indonézia]; ida daruak nian, Janelle Saffin maka sei modera, sei foka liu kona-ba “Perspetiva Rejionál sira kona-ba Fronteira Tasi nian sira”, ho atensaun espesiál ba Tasi Timor nian. Iha parte ida ne’e sei konta ho Ministru Estadu Presidénsia Konsellu Ministrus, Agio Pereira, Jalila Abdul Jalil [Malázia], I Made Andi Arsana [Indonézia] no Doutór Hao Duy Phan [Singapura].
Tema prinsipál sira iha konferénsia ne’e Ministru Negósiu Estranjeiru no Kooperasaun, Hernâni Coelho, maka sei rezume molok observasaun finál sira, ne’ebé Mari Alkatiri sei halo.
Portavós Governu Konstitusionál VI nian, Ministru Estadu Agio Pereia, hato’o ninia satisfasaun tanba partisipante sira ne’ebé halibur hamutuk iha konferénsia ne’e mesak personalidade nivel aas de’it, no mós tanba oportunidade hodi debate kona-ba papél Direitu ba Tasi no fronteira tasi nian sira: “Timor-Leste valoriza papél direitu internasionál iha matéria rezolusaun ba disputa sira no rekoñese importánsia husi organizmu sira hanesan ITLOS, atu defende direitu Estadu ki’ik sira nian no promosaun ba rezolusaun ho dalan dame ba disputa sira”. REMATA
