Sorumutuk Konsellu Ministrus nian iha loron 17 fulan-maiu tinan 2016
Prezidénsia Konsellu Ministrus
VI Governu Konstitusionál
..............................................................................................................................
Díli, loron 17 fulan-maiu tinan 2016
Sorumutuk Konsellu Ministrus nian iha loron 17 fulan-maiu tinan 2016
Konsellu Ministrus hala’o sorumutuk iha loron-tersa ne’e, iha Palásiu Governu, iha Dili no aprova ona:
1. Proposta kona-ba Rezolusaun Parlamentu nian ba aprovasaun akordu iha área Komérsiu entre Timor-Leste no Vietname
Vietname hanesan membru husi Asosiasaun Nasoins Sudeste Aziátiku (ASEAN) no fó apoiu ba kandidatura Timor-Leste nian atubele sai hanesan membru plenu organizasaun ne’e nian. Nasaun rua ne’e nafatin mantein relasaun kooperasaun nian ne’ebé iha benefísiu ba sira hotu.Tanba ne’e, Governu haruka ba Parlamentu Nasionál akordu ne’ebé maka iha objetivu dezenvolvimentu relasaun ekonómika no komersiál sira entre nasaun rua ne’e, atu órgaun soberania ne’e bele halo ratifikasaun ba akordu ne’e.
2. Dekretu-Lei kona-ba Orgánika Ministériu Petróleu no Rekursu Minerál sira
Atubele hasoru dezafiu boot sira iha área rekursu minerál sira, sai hanesan obrigasaun ida atu define no aprova estrutura organizasionál Ministériu Petróleu no Rekursu Minerál sira nian, na’i ulun governu nian ne’ebé sai nu’udar responsavel ba setór petrolíferu no minerál. Ho aprovasaun ba lei orgánika ne’e, hakarak fó ba Ministériu ne’e estrutura ida ne’ebé permite hala’o sira-nia atribuisan sira ho efikás tebes-tebes, atunune’e bele fó kontribuisaun atu hadi’a servisu hirak ne’ebé ministériu ne’e halo no kualifikasaun rekursu umanu sira ne’ebé mak iha.
