Embaixadora Maria Helena Pires aprezenta ofisialmente ninia kredensiál ba Sekretáriu-Jerál Nasoins Unidas nian, Ban Ki-Moon, atuhodi hala’o kna’ar nu’udar Reprezentante Permanente Timor-Leste nian iha Nasoins Unidas. Serimónia ne’e hala’o tiha iha loron 12 fulan-abril tinan 2016, iha Novaiorke (Estadus Unidus Amérika).

Hamutuk ho Embaixadora Timor-Leste, aprezenta mós kredensiál husi Reprezentante sira husi Indonézia, Kanadá, Granada no Kyrgistaun.

Hafoin serimónia, Embaixadora timoroan iha sorumutuk kortezia ida ho Sekretáriu-Jerál Nasoins Unidas nian. Ban Ki-Moon kumprimenta tiha Embaixadora no ko’alia uitoan kona-ba Objetivu sira Dezenvolvimentu Sustentável (ODS), mudansa klimátika (Akordu Paris nian), ne’ebé mak asina tiha iha loron 22 fulan-abril tinan 2016) no kestaun sira seluk ne’ebé relasiona ho igualdade jéneru.

Kona-ba kestaun hirak ne’e, Maria Helena Pires deklara  katak Misaun Permanente Timor-Leste nian ba Nasoins Unidas prontu atu mantein no reforsa kooperasaun ho Organizasaun Nasoins Unidas nian, liu-liu iha asuntu sira hanesan ODS, mudansa klimátika, dame, seguransa internasionál no direitus umanus.

Iha serimónia aprezentasaun kredensiál ne’e nian, Embaixadora Timor-Leste akompaña  husi nia kaben Zacarias Albano da Costa, no husi Konselleiru Misaun Permanente Timor-Leste nian iha Nasoins Unidas, Júlio da Costa Freitas. Nune’e mós, Sekretáriu-Jerál Ban Ki-Moon akompaña  husi nia kaben, Yoo Soon-Taek.