Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 19 fulan-abril tinan 2016

Governu Timor-Leste hato’o ninia solidaridade ba Ekuadór

Hodi povu Timor-Leste nia naran, Governu aprezenta ninia kondolénsia ba família no belun sira husi vítima sira husi rai nakdoko maka’as ne’ebé mak akontese iha loron-sábadu, besik sidade Muisne, iha parte norte Ekuadór nian. Governu hato’o mós solidariedade ba Governu no povu Ekuadór, ne’ebé maka terus tanba konsekuénsia sira husi dezastre  ne’e.

Ema rihun barak maka mate ka kanek no hela fatin no infraestrutura sira  aat hotu ne’ebé agrava kondisaun moris nian, tanba ne’e Governu Timor-Leste louva serbisu polísia no militár sira nian iha área hirak ne’ebé mak afetada liu.

Portavós Governu Konstitusional VI nian, Ministru Estadu Agio Pereira, observa katak “ami hatene dezastre ne’ebé  povu sira Ekuadór nian hasoru. Ami hato’o ami-nia kondolénsia ne’ebé kle’an liu ba família sira ne’ebé lakon sira-nia ema sira ne’ebé maka sira hadomi no hahii ba serbisu husi sira ne’ebé maka nafatin kontinua buka ema sira ne’ebé mak sei iha posibilidade bele moris. Iha loron hirak susar nian ne’e, Timor-Leste hatudu ninia simpatia ba Prezidente Rafael Correa, Governu no povu Ekuadór, iha dezafiu hirak ne’ebé sira hotu sei hasoru iha semana no fulan hirak tuirmai”.