Governu lansa ona fatuk dahuluk atu harii Monumentu Rekonsiliasaun nian ne’ebé marka masakre Aifu. Partisipa iha serimónia ne’e reprezentante sira hosi partidu Frente Revolucionário de Timor-Leste Independente (FRETILIN), União Democrática Timorense (UDT), Associação Popular Democrática Timorense (Apodeti), Klibur Oan Timor As’wain (KOTA) no Partidu Trabalhista, ne’ebé halibur hamutuk iha Aifu, Suku Poetete, Postu Administrativu Ermera, iha kinta, loron 7 fulan-abríl 2016.

Vise-Ministru Solidariedade Sosiál, Miguel Marques Gonçalves Manetelu, hateten inisiativa harii monumentu ne’e mai hosi komunidade. “Governu nia prezensa iha fatin ne’e, atu fó de’it apoiu  ba inisiativa ne’e,” Manetelu dehan. Na’i-ulun ne’e hatutan tan, hanesan ita hatene, iha tinan 1974 no 1975, kuadru médiu, delegadu no militante sira hosi partidu lima ne’e ataka malu iha fatin ne’e, hodi rezulta timoroan barak maka mate.

Nia husu atu konstrusaun monumentu ne’e nian tenke hala’o to’o remata atubele asegura fatin ba erói sira-nia nia ruin, ne’ebé ohin-loron família sira rekolla tiha ona. Nia mós hein katak ba futuru mate ruin sira ne’ebé mak rekolla tuir mai bele halo’ot mós iha fatin ne’e hanesan Jardin Erói sira nian.

Entretantu, Prezidente Komisaun Organizadora ba monumentu Aifu, Ernesto Fernandes “Dudo”, rekoñese katak inisiativa harii monumentu ninia intensaun mak atu halo rekonsiliasaun entre komunidade ne’ebé uluk konsidera malu hanesan funu maluk  hodi oho malu tanba diferensa partidu polítiku.

“Agora funu hotu ona, ema sei sei oho malu. Ho razaun ida ne’e mak ami foti inisiativa atu halibur partidu lima no komunidade sira hotu husi Suku 12, atu soe kro’at, labele ódiu  no rai-kuna ba malu. Tanba iha tempu ukun an nian laiha ona tempu ba ita atu oho malu ka vinga malu,” Dudu esplika.

Prezidente partidu UDT, Gilman A. Exposto Santos, hateten, konstrusaun monumentu ne’e nian hanesan disponibilidade no boavontade ida, reprezenta ema hotu ne’ebé sai vítima husi funu ida ne’e.

“Dame tenke hahú hosi ita, hahú husi ema ne’ebé iha vontade harii dame iha ita-nia rain. Labele dehan halo damebainhira ema seluk sei afetadu hela ho diskriminasaun”, Prezidente Partidu UDT esplika.

Partisipa iha seremónia ne’e reprezentante husi Parlamentu Nasionál, Autoridade Lokál sira, liana’in no komunidade sira.