Iha tuku 16:00 loron 13 fulan-abríl [ohin dadeer tuku 05:00 oras Dili nian], Ministru Planeamentu no Investimentu Estratéjiku no Negosiadór Prinsipál ba Fronteira Tasi nian, Kay Rala Xanana Gusmão hala’o sorumutuk ho Sekretáriu-Jerál Nasoins Unidas nian, Ban Ki-Moon.

Sorumutuk ne’e hala’o iha sede Nasoins Unidas nian, iha Novaiorke. Ministru Xanana Gusmão esplika katak nia husu antes ona sorumutuk ne’e “atu diskute prioridade nasionál ami-nia nasaun nian – define ami-nia fronteira tasi nian sira ne’ebé permanente”.

Sorumutuk ne’e hala’o hafoin notifikasaun ne’ebé Governu Timor-Leste halo ba Governu Austrália, iha loron segunda ne’e, hodi publika inísiu husi Konsiliasaun Obrigatória, tuir buat ne’ebé hateten iha Convenção das Nações Unidas sobre o Direito do Mar (CNUDM), [Konvensaun Nasoins Unidas nian kona-ba Direitu Tasi nian (KNUDT)].

Timor-Leste hahú prosesu ne’e hanesan dalan ida atubele lori nasaun rua ne’e hodi hahú tuur hamutuk atu ko’alia kona-ba sira nia fronteira tasi nian sira ne’ebé komún entre sira. Gabinete Fronteira Tasi nian prodús ona dokumentu ida ho esplikasaun ne’ebé detallada kona-ba Konsiliasaun Kompulsória.

Sorumutuk ho Sekretáriu-Jerál Nasoins Unidas nian ne’e hotu tiha, Ministru Xanana Gusmão afirma, iha Konferénsia Imprensa, katak Governu sei “serbisu ho Nasoins Unidas, ho konsiliadór independete sira no ho Austrália, atubele alkansa ami-nia prioridade nasionál – ami-nia tasi sira nia soberania no mós rai-maran sira ninian”.

Haree iha ne’e deklarasaun ida husi Portavós Governu nian kona-ba sorumutuk iha Novaiorke ne’e.

Atu haree Ministru Planeamentu no Investimentu Estratéjiku no Negosiadór Prinsipál ninia deklarasaun ba Imprensa, klik iha ne’e.