Ministru Justisa iha eventu internasionál sira iha ámbitu CPLP nian
Ministru Justisa, Ivo Valente, hela iha Lisboa durante loron 19 no 20 fulan-abril atuhodi partisipa iha abertura sorumutuk internasionál rua, nu’udar Prezidente Konferénsia Ministru Justisa CPLP nian.
Ministru Justisa iha sorumutuk Konsellu Superiór sira Majistratura nian
Data: loron 19 fulan-abríl tinan 2016
Fatin: Supremu Tribunál Justisa nian, Lisboa
Ministru Justisa nian, Ivo Valente, sei partisipa iha abertura sorumutuk ida Konsellu Superiór sira Majistratura nian. Serimónia abertura nian, ne’ebé sei hala’o iha Supremu Tribunál Justisa Portugál, sei prezide husi Prezidente Repúblika Portugeza nian, Marcelo Rebelo de Sousa, no sei konta mós ho intervensaun sira husi Prezidente Konsellu Superiór Majistratura nian no Prezidente Supremu Tribunál Justisa Portugál nian, António Silva Henriques Gaspar, Ministra Justisa Portugál nian, Francisca Van Dunem no Ministru Ivo Valente, nu’udar Prezidente Konferénsia Ministru Justisa sira CPLP nian. Sorumutuk ne’e sei konta ho prezensa husi Prezidente Tribunál Rekursu nian (nu’udar substituta) no Prezidente Konsellu Superiór Majistratura nian (nu’udar substituta), Maria Natércia Gusmão Pereira, no husi Juís Direitu Majistratura Judisiál nian, Antonino Gonçalves no sira-nia omólogu sira husi Estadu hirak ne’ebé mak forma CPLP.
Ministru Justisa nian iha Sorumutuk da-2 kona-ba Pontu Kontaktu nian sira husi Rede Judisiária CPLP nian
Data: loron 20 fulan-abríl
Fatin: Lisboa
Prezidente Konferénsia Ministru Justisa sira husi Nasaun sira Lia-Ofisiál Portugés nian, Ivo Valente, Ministru Justisa Timor nian, sei halo diskursu iha sesaun abertura Sorumutuk da-2 Pontu Kontaktu sira husi Rede Judisiária CPLP nian. Rede ne’e harii ona iha fulan-novembru tinan 2005 no kompostu husi reprezentante sira (“pontu kontaktu nian sira”) ne’ebé hili husi Estadu membru sira no indika husi sira ida-idak ninia Ministériu Justisa, Ministériu Públiku no Prokuradór Jerál sira, nune’e mós husi organizmu judisiál sira
Husi Timor-Leste, sira ne’ebé sei partisipa maka Diretór-Jerál Ministériu Justisa nian, Henrique de Oliveira Ximenes, Juís Direito Majistratura Judisiál nian, Antonino Gonçalves no Adjunta Prokuradór-Jerál Repúblika nian, Zélia Trindade.
Iha Sorumutuk ne’e sei asina mós Memorandu Entendimentu entre Konferénsia Ministru Justisa husi Nasaun sira Lia-Ofisiál Portugés nian no Konferénsia Ministru Justisa Nasaun Iberu-amerikanu sira (COMJIB-sigla iha lia-portugés), ne’ebé sei reprezenta husi nia Sekretáriu Jerál, Arkel Benítez Mendizábal.
Sorumutuk serbisu nian ho Sekretáriu Ezekutivu CPLP, Embaixadór Murade Murargy, no ho Prezidente Komisaun ASEAN nian ne’ebé lokaliza iha Lisboa, Embaixadór Philippe J. Lhuillier, sei hala’o nafatin.
Ministru Ivo Valente mós sei ba vizita Institutu Rejistu no Notariadu Portugál nian , ne’ebé mak iha tempu besik sei simu asaun formasaun nian ida ba fulan balu nia laran, ba notáriu no konservadór estajiáriu timoroan sira, iha ámbitu Protokolu Kooperasaun nian entre Ministériu Justisa Timor-Leste no Portugál, ne’ebé mak asina ona iha loron 25 fulan-fevereiru tinan 2016.
