Ekipa Grupu Trabalhu ba Objetivu Dezenvolvimentu Sustentável (ODS) hala’o sorumutuk dahuluk, iha segunda-feira ne’e, loron 29 fulan-feveeiru, iha sala sorumutuk Ministériu Defeza nian.

Objetivu husi enkontru ne’e atu hahú diskusaun kona-ba prosesu implementasaun ODS nian iha Timor-Leste. Iha enkontru ne’e, diskute mós kona-ba enkuadramentu ODS nian, iha tempu badak nia laran, iha planu  orsamentu nian ba 2017.

“GrupuTraballu ne’e nia knaar atu fasilita debate kona-ba implementasaun ODS nian iha Timor-Leste. Ami sei servisu hamutuk ho liña ministériu sira atu identifika objetivu prioritáriu sira, ne’ebé aliña ho ita-nia Planu Estratéjiku, no hahú implementa daudaun ona iha 2017. Ami mós sei haree oinsá itabele kria mekanizmu ida atu monitoriza implementasaun ba programa ne’e” hateten Sr. Alex Tilman, Ofisiál ba Politika Públika sira husi Gabinete  Primeiru-Ministru nian.

Ekipa husi Ministériu Finansa no Gabinete Primeiru-Ministru nian esplika saida mak Objetivu Dezenvolvimentu Sustentável no oinsá mak ajenda globál foun ne’e liga ho ita-nia Planu Estratéjiku Dezenvolvimentu nian. Nune’e mós husi ekipa g7+ nian ko’alia kona-ba oinsá bele atinje  Objetivu sira Harii Dame no Harii Estadu liuhusi ODS.

Iha sesaun ikus, elementu ligasaun (“focal point”) sira husi Ministériu idak-idak identifika objetivu prinsipál sira husi ODS nian ne’ebé iha sira ninia responsabilidade,  ne’ebé  sei debate fali  ho parte kompetente sira seluk iha ministériu idak-idak, atu nune’e bele prodús Planu Asaun ba 2017.

Sorumutuk ne’e organiza husi Gabinete do Primeiru-Ministru nian no partisipa husi Diretór- Jerál sira, Diretór Nasioanál noelementu ligasaun husi Ministériu ida-idak no mós reprezentante sira husi órgaun Governu sira seluk.