Sorumutuk Konsellu Ministrus nian loron 1 fulan-marsu tinan 2016
Prezidénsia Konsellu Ministrus
VI Governu Konstitusionál
..............................................................................................................................
Dili, loron 1 fulan-marsu tinan 2016
Komunikadu Imprensa
Sorumutuk Konsellu Ministrus nian iha loron 1 fulan-marsu tinan 2016
Konsellu Ministrus hala’o sorumutu iha tersa ne’e, loron 1 fulan-marsu, iha Palásiu Governu, iha Dili, no aprova ona Proposta kona-ba revizaun ba dezeñu no kuadru kuantidade no presu nian (iha lia-Inglés: BoQ – Bill of Quantities) husi aeroportu Oecusi Ambenu, ne’ebé aprezenta husi konsórsiu nu’udar responsável ba obra ne’e.
Estudu tékniku sira, hetan validasaun husi konsultór sira, ne’ebé halo ona foin daudaun ne’e haree ba ninia dimensaun foun, kualifikasaun no kalendáriu konstrusaun nian. Koñesimentu ne’ebé hetan kona-ba karaterizasaun rai nian no redusaun husi dimensaun operasionál nian sira rezulta redusaun substansiál ida husi valór ne’ebé projeta ona ba obra ne’e, hodi mantein parámetru kualidade regulamentár nian hotu-hotu ne’ebé bele aplika.
Konsellu Ministrus analiza mós - Memorandu Entendimentu nian kona ba Programa “Ho Musan ida”.
Projetu ba dezenvolvimentu Programa ida ne’e nian iha postu Administrativu Bagia, Munisípiu Baukau, ne’ebé Governu no Fundasaun Xpand atu asina, Ministériu Agrikultura no Peskas aprezenta ona, hamutuk ho reprezentante Fundasaun ne’e nian.
Ida ne’e hanesan inisiativa sosiál ida ho preokupasaun sira kona-ba ambiente, ne’ebé dezenvolve daudaun ona iha Timor-Leste, ne’ebé promove inisiativa floresta komunitária sira, hanesan sekuestru karbonu nian (prosesu naturál kona-ba muda gas karbonu nian husi atmosfera). Intensaun husi programa ne’e atu halo ambiente sai sustentável, kontribui atu halakon moris-kiak no hamlaha, aumenta koñesimentu kona-ba kestaun ambiente nian no kria parseria rejionál sira.
