Fórum Ekonómiku Globál I CPLP nian mak  inisiativa prinsipál husi prezidénsia rotativa organizasaun nian, ne’ebé agora Timor-Leste maka kaer knaar ne’e. Fórum ne’e hahú iha loron 25 fulan-fevereiru, iha Dili, ne’ebé halibur delegasaun sira mai husi nasaun 20 liu, no mós empreza no investidór sira atus resin husi Komunidade Nasaun sira Lia-Portugés no Asosiasaun Nasaun sira Sudeste Aziátiku (ASEAN-sigla iha lia-inglés) nian.

Iha diskursu abertura, Primeiru-Ministru, Rui Maria de Araújo, afirma ona katak “ita hakarak lori ba ita-nia Komunidade, ba ita-nia nasaun maun-alin sira, dinámika ekonómika foun ida no emprezáriu ida ne’ebé bele hatudu ita-nia poténsia, la’os de’it entre ita, Estadu Membru sira, maibé mós entre ita no ho ita-nia parseiru sira”.

Rui Maria de Araújo hatutan tan katak “FórumEkonómiku Globál I CPLP nian, maka biban ida ne’ebé laiha biban seluk maka hanesan ba emprezáriu sira koñese no fó koñese ninia negósiu sira, ba-iha relasaun ida ne’ebé bele halo kontaktu diretu entre empreza sira, hodi promove espíritu emprendedór”.

Nasaun idak-idak iha nia sala temátika, ne’ebé bainaka idak-idak iha biban atu koñese realidade emprezariál husi nasaun ne’ebé maka nia reprezenta. Sorumutuk entre emprezáriu sira nian ne’e hala’o durante loron tolu, ne’ebé nia ajenda halo uluk tiha ona, haree tuir perfil kada empreza nian no sira-nia nesesidade.

Agrikultura, agroindústria, agroalimentasaun, konstrusaun sivil no obras públikas, edukasaun, enerjia, indústria transformadora sira, saúde, teknolojia sira informasaun nian, telekomunikasaun sira, transporte sira no turizmu maka setór  atividade nian balu ne’ebé lori investidór sira ba Fórum Dili nian.

Inisiativa ida ne’e konkretiza determinasaun hodi harii parseria sira entre empreza sira husi espasu Komunidade luzófona nian.

Sorumutuk ne’e hetan tulun husi CPLP, husi Konfederasaun Emprezariál CPLP nian (CE-CPLP-sigla iha lia-portugés) no husi Uniaun Esportadór sira CPLP nian (UE-CPLP-sigla iha lia-portugés) no hatudu Timor-Leste hanesan “plataforma ba dezenvolvimentu”.

Aleinde Timor-Leste, partispa mós iha feira investidór ida ne’e, husi nasaun sira rejiaun oioin mundu nian, entre sira ne’e mak Angola, Austrália, Brazil, Brunei, Kabuverde, Kamboja, Kazakistaun, España, Giné-Bisau, Giné Ekuatoriál, Indonézia, Malázia, Mosambike, Portugál, SaunTomé no Prínsipe, Singapura Tailándia no Vietname.