Ministru Justisa diriji ona sesaun maklokek ba sorumutuk II husi Komité Koordenasaun Estratéjiku Komponente Justisa nian husi Programa Apoiu ba Governasaun Demokrátika iha Timor-Leste, ne’ebé hala’o ona iha instalasaun sira husi Institutu Diplomátiku Ministériu Negósius Estranjeirus no Kooperasaun, iha Díli, iha loron 15 fulan-fevereiru tinan 2016.

Sorumutuk ne’e loke ona ho aprezentasaun jerál ida no balansu ba atividade sira husi komponente rua Programa nian : fó apoiu ba Kámara Kontas no ba Polísia Sientífika Investigasaun Kriminál (PSIK) nian. Aprezentasaun  sasin hosi parseiru diretu oin-oin, timoroan no portugés sira, no pasa revista ba objetivu prinsipál sira husi Programa ne’e, nune’e mós ninia impaktu iha kuadru jerál governasaun di’ak nian.

Ministru Ivo Valente hateten katak “ Polísia Sientífika Investigasaun Kriminál (PCIC -sigla iha lia-portugés) nian, ikus ne’e hala’o ona nia funsaun sira, hodi hatudu loloos duni hanesan órgaun polísia kriminál nian ida ne’ebé ho kualifikasaun espesiál sira kona-ba investigasaun ba krime sira ne’ebé grave, organizada ka kompleksa”. Nia hateten mós katak “ ezisténsia husi Laboratóriu Polísia Sientífika nian la’ós importante de’it atu afirma hanesan instituisaun PCIC nian, maibé ninia knaar importante  ba órgaun sira ne’ebé maka responsável tuir konstituisaun, atuhodi hala’o asaun penál, efetivu, domina kona-ba kadeia prova nian no ikus liu, tribunál sira Timor nian iha ona provas, deside,hodi julga, husi elementu esensiál sira hotu, atubele hala’o justisa materiál nian, bainhira  hala’o justisa lori povu nia naran”.

Kona-ba  Kámara Kontas nian, Ministru hatete katak, “nia maka reprezenta hanesan marka importante ida ba-iha reforma setór públiku nian no governasaun  di’ak, hodi hatudu momoos kapasidade kona-ba  prestasaun kontas husi servisu oioin Administrasaun Públika nian no kria kultura ida ho rigór ba jestaun husi rekursu finanseiru públiku sira”.

Durante sorumutuk ne’e, Embaixadora Uniaun Europeia nian iha Timor-Leste, Sylvie Tabesse, fó sai ona katak, prolongamentu Programa Justisa nian liu ona fulan 8, nune’e hatudu fiar, iha Portugál (Camões, IP, parseiru ho Tribunál Kontas nian no Diresaun-Jerál husi Polísia Judisiária portugés sira nian) hodi fó kontinusaun ba atividade sira to’o loron 31 fulan-outubru tinan 2016.

Aleinde sira ne’ebé temi ona, partisipa mós Prezidente Tribunál Rekursu, Juíza Maria Natércia Gusmão, Embaixadór Portugál, Manuel Gonçalves de Jesus, Defensór Púbiku-Jerál, Sérgio Hornai, Diretór Nasionál PCIC, Prokuradór Vicente Fernandes e Brito, reprezentante Ordenadór Nasionál Fundu Europeu nian ba Dezenvolvimentu, Maria dos Reis, reprezentante Diresaun-Jerál Polítika Justisa Portugál nian, Fernando Sousa Juniór, reprezentante Tribunál Kontas Portugál nian, Luís Mota, no Diretora Servisu Kooperasaun Camões nian, IP – Intitutu Kooperasaun no Língua, Paula Barros, no sira seluk.