Ró militár husi Forsa Operasionál Marítima da-152 Xina nian  to’o iha portu Dili, iha sábadu, loron 16 fulan-janeiru 2015, hanesan parte ida husi vizita mai Timor-Leste durante loron lima, husi loron 16 to’o 20 fulan-janeiru 2015.

Objetivu husi vizita ró militar ne’e nian mak atu hametin di’ak liután relasaun entre Timor-Leste ho Xina iha área defeza nian. Aleinde ne’e, vizita ne’e atu fahe mós esperiénsia entre Forsa Navál Xina nian ho Forsa Defeza Timor-Leste nian husi Komponente Navál.

Vise-Xefe Estadu Maior husi Frota Tasi Orientál nian, Komodoro Mariña nian husi Ezérsitu Libertasaun Populár Xina nian, Wang Jianxuan, iha nia diskursu esplika katak, vizita ne’e, ba nia, hanesan orgullu ida, tanba ida ne’e hanesan dala uluk maka ró militár Xina nian ida halo vizita mai Timor-Leste.

“Ha’u agradese tanba bele mai vizita Timor-Leste, atu hametin di’ak liután koopersaun bilaterál entre nasaun rua ne’e iha área defeza, agora no iha tempu oinmai hodi asegura seguransa ba nasaun rua, ne’ebé lokaliza iha rejiaun Ázia. Aleinde ne’e, ami mós bele koñese di’ak liután kultura no tradisaun nasaun idak-idak nian”, Wang hateten.

Komodoro mós husu ba Forsa Navál Timor-Leste nian atu serbisu maka’as liután hodi asegura tasi no Timór nia rikusoin sira.

Ministru Defeza Timor-Leste, Cirilo Cristóvão, agredese ba vizita Forsa Navál Xina nian mai Timor Leste. “Ha’u orgullu no agradese ba vizita ida-ne’e. Ha’u-nia saudasoens ho vizita ida-ne’e bele hakle’an liután relasaun entre nasaun rua ne’e iha área defeza”, Cirilo reafirma.

Ministru Defeza agradese ba tulun ne’ebé durante ne’e Timor-Leste hetan husi Xina no hein katak iha futuru bele kontinua nafatin relasaun di’ak iha área defeza.

Durante estadia iha Timor-Leste, forsa Xina nian sira ne’e hala’o mós atividade desportiva sira hanesan basketeból, futeból no halo mós tratamentu saúde ba estudante sira husi Eskola Primária Fatuhada iha Dili.