Sorumutuk Konsellu Ministrus loron 27 fulan-janeiru tinan 2016
Prezidénsia Konsellu Ministrus
VI Governu Konstitusionál
..............................................................................................................................
Dili, loron 27 fulan-janeiru tinan 2016
KOMUNIKADU IMPRENSA
Sorumutuk Konsellu Ministrus loron 27 fulan-janeiru tinan 2016
Governu hala’o sorumutuk iha kuarta-feira ne’e, loron 27 fulan-janeiru tinan 2016, iha sala sorumutuk Konsellu Ministrus nian, iha Palásiu Governu, iha Dili, ne’ebé hahú ho análize rezultadu hosi vizita ofisiál Prezidente Indonézia nian, Joko Widodo, mai Timor-Leste, iha loron 26 fulan-janeiru. Forma pozitiva oinsá hala’o sorumutuk sira, ne’ebé koa’lia liu kona-ba hametin relasaun bilaterál sira ho nasaun viziñu ne’e, hosi biban ida ne’e maka Primeiru-Ministru felisita membru Governu sira no komisaun organizadora ba resesaun Prezidente no Primeira Dama Indonézia nian.
Konsellu Ministrus aprova ona:
1. Dekretu Governu nian kona-ba ezekusaun Orsamentu Jerál Estadu nian ba tinan 2016
Diploma ida ne’e estabelese regra sira kona-ba ezekusaun no monitorizasaun Orsamentu Jerál Estadu nian (OJE) ba tinan 2016, ne’ebé aprova ona liuhusi Lei n.u 1/2016, iha loron 14 fulan-janeiru.
Governu hakarak garante kontrolu orsamentál ida ne’ebé rigorozu, nune’e mós atu disiplina despeza públika sira atubele la’o tuir orden, hanesan aprova ona iha OJE. Verba sira tenke investe ho forma ida ne’ebé bele fó benefísiu ba povu nia moris, liuhusi prestasaun servisu ne’ebé efikás, efisiente no justu, hodi kontribui ba jestaun ida di’ak no bele hetan rezultadu sira ne’ebé konkretu.
Reforsa responsabilizasaun Administrasaun Públika nian, ho objetivu atu hadi’a prestasaun servisu sira, tanba ne’e maka, hahú hala’o ona alterasaun ida ba-iha sistema kontrolu finansas públikas sira.
2. Alterasaun dahuluk ba Dekretu-Lei n.u 2/2009, loron 15 fulan-janeiru, kona-ba Rejime Jurídiku Espesiál Aprovizionamentu nian husi Servisu Autónomu Medikamentu no Ekipamentu nian sira Sáude nian,EP (SAMES)
Halo alterasaun sira prinsipál ba Dekretu-Lei ida ne’e, ho nia objetivu atu simplifika prosesu akizisaun ba
produtu farmaséutika sira no ekipamentu médiku ospitalár nian. Diploma ida ne’e abranje, aleinde aprovizionamentu ne’ebé halo diretamente husi SAMES, abranje mós ba-iha aprovizionamentu ne’ebé hala’o iha situsaun emerjénsia, husi servisu sentrál sira Ministériu Saúde nian, Ospitál sira Servisu Nasionál Saúde no ba Laboratóriu Nasionál Saúde nian.
Konsellu Ministru analiza ona mós, deklarasaun Timor-Leste nian kona-ba situasaun iha peninsula Koreia [Coreia] nian. Governu, liuhusi deklarasaun ida Ministériu Negósius Estranjeirus no Kooperasaun nian, hato’o ninia preokupasaun ho anúnsiu ne’ebé fó sai husi Repúblika Populár Demokrátika Koreia nian [República Popular Democrática da Coreia], kona-ba realizasaun teste nuklear ida idrojéniu nian.
