Sorumutuk Konsellu Ministrus nian iha loron 25 fulan-janeiru tinan 2016
Prezidénsia Konsellu Ministrus
VI Governu Konstitusionál
..............................................................................................................................
Dili, loron 25 fulan-janeiru tinan 2016
KOMUNIKADU IMPRENSA
Sorumutuk Konsellu Ministrus loron 25 fulan-janeiru tinan 2016
Konsellu Ministrus hala’o ona sorumutu iha segunda-feira ne’e, loron 25 fulan-janeiru tinan 2016, iha sala sorumutuk Konsellu Ministrus nian, iha Palásiu Governu, iha Dili no analiza tiha ona akordu sira ne’ebé mak sei asina entre Timor-Leste no Repúblika Indonézia, durante vizita ofisiál Prezidente Joko-Widodo iha país ne’e, iha loron 26 fulan-janeiru tinan 2016. Akordu ne’e abranje área sira hanesan meteorolojia, klimatolojia no jeofízika, peska, arkivu, juventude no desportu no rekursu minerál sira.
Ho akordu hirak ne’e, nasaun rua ne’e hakarak hametin kooperasaun bilaterál forte ne’ebé iha tiha ona, liuhosi troka esperiénsia sira, koñesimentu no informasaun, nune’emós hametin lasu amizade entre país rua ne’e.
Konsellu Ministrus mós análiza tiha ona, ajenda vizita Prezidente Indonézia nian, hodi finaliza buat balun kona-ba organizasaun no lojístika nian.
