Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 20 fulan-janeiru tinan 2016
Vizita Forsa Navál Xina nian remata ona
Ohin forsa operasionál husi mariña Xina nian remata ona nia vizita loron 5 iha Timor-Leste, bainhira Kontratorpedeiru [espésie ró-funu nian atu kontra torpedu] Xina nian Jinan, fragata Yiyang no ró abastesimentu nian Qiandao Hu husik portu Dili. Vizita ofisiál husi Forsa Operasionál Mariña Ezérsitu Libertasaun Popular Xina nian (ELPC) da-152., sai hanesan vizita dahuluk ba Timor-Leste no hanesan símbolu husi relasaun bilaterál sira ne’ebé metin liután entre país rua ne’e.
Durante vizita ne’e, Ministru Defeza Timor-Leste nian, Cirilo Cristóvão, fó hanoin fila-fali katak Repúblika Populár Xina nian mak hanesan apoiante ne’ebé firme “iha luta Timor-Leste nian ba independénsia no hodibele sai hanesan Estadu soberanu ida iha kontestu mundiál”. Nia deklara katak sai hanesan “ksolok boot ida bainhira haree relasaun bilaterál sira iha área Defeza nian sai metin liután”.
Kooperasaun entre país rua iha setór ne’e inklui konstrusaun ba edifisiu Ministériu Defeza nian, vizita sira husi reprezentante timoroan sira ba Ministériu Defeza Nasionál Xina nian no ba kuartél-jenerál Ezérsitu Libertasaun Populár Xina nian no valorizasaun profisionál ba Forsa Defeza Timor-Leste nian (FDTL) liuhusi kontaksu sira entre Forsa Armada país rua nian, inklui mós formasaun ba militár tiomoroan sira iha Akademia Militár Xina nian.
Ministru Cirilo Cristóvão hato’o ona Timor-Leste ninia interese atu aprende husi ELCP kona-ba ninia “esperiénsia ne’ebé barak iha matéria asisténsia umanitária nian no Katástrofe” no nia hatutan katak ida ne’e tenke sai hanesan parte importante ida husi relasaun bilaterál sira ne’ebé oras ne’e eziste iha área defeza nian. Liuhusi kooperasaun ida ne’e, Timor-Leste bele aumenta liután ninia kapasidade atu halo intervensaun hanesan “ajente ativu atu reforsa seguransa rejionál no internasionál nian”.
Durante vizita ne’e, militár Xina nian sira mantein nafatin enkontru ho militár timoroan sira, sira promove ona semináriu ida kona-ba kombate pirataria nian [asaun kriminoza ne’ebé prátika husi ema pirata sira] no partisipa oan iha kompetisaun desportivu nian balun. Komodoru Wang Jianxun, komandante Forsa Operasionál xina, hasoru malu mós ho komandante FDTL nian, Majór Jenerál Lere Anan Timur.
Portavós Governu Konstitusionál VI nian, Ministru Estadu Agio Pereira, hateten katak “Vizita ofisiál Forsa Operasionál Mariña xineza nian ida, sai hanesan dezenvolvimentu pozitivu ida tan, iha istória naruk ida kona-ba apoiu no kooperasaun entre Timor-Leste ho Xina. Governu sauda fortalesimentu relasaun bilaterál liuhusi interasaun hanesan ne’e, no mós esforsu permanente sira kona-ba dezenvolvimentu kooperasaun amigavel no konstrutiva ida entre nasaun rua ne’e”.