Sorumutuk Konsellu Ministrus nian loron 19 fulan-janeiru tinan 2016
Prezidénsia Konsellu Ministrus
VI Governu Konstitusionál
..............................................................................................................................
Dili, loron 19 fulan-janeiru tinan 2016
Komunikadu Imprensa
Sorumutuk Konsellu Ministrus nian loron 19 fulan-janeiru tinan 2016
Konsellu Ministrus hala’o sorumutuk estraordinária nian iha tersa ne’e, loron 19 fulan-janeiru tinan 2016, iha sala sorumutuk Konsellu Ministrus nian, iha Palásiu Governu, iha Dili, no aprova tiha ona:
1. Dekretu-Lei kona-ba Estatutu Administrasaun Munisipál nian sira, Autoridade Munisipál sira no Grupu Tékniku Interministeriál nian ba Desentralizasaun Administrativa
Estatutu Administrasaun Munisipál nian sira, Autoridade Munisipál sira no Grupu Tékniku Interministeriál nian ba Desentralizasaun Administrativa define ninia kuadru jurídiku organizasaun, kompeténsia no funsionamentu nian, hodi kria kondisaun hirak ne’ebé presiza atu konkretiza reorganizasaun Administrasaun Lokál Estadu nian no hahú prosesu pasajen kompeténsia sira husi Administrasaun Sentrál Estadu nian ba Administrasaun Lokál.
Grupu Tékniku Interministeriál ba Desentralizasaun Administrativa no, depende ba nia, Grupu Tékniku Permanente, tuir mai Grupu Traballu Tékniku Interministeriál ne’ebé, iha tinan rua ikus ne’e, koordena ona estratéjia sira kona-ba deskonsentrasaun no desentralizasaun administrativu Governu nian. Grupu hirak ne’e sei kontinua fó apoiu ba koordenasaun téknika ba prosesu deskonsentrasaun territoriál.
Ho aprovasaun diploma ida ne’e, Governu iha kondisaun hirak ne’ebé di’ak liu atu asegura prestasaun beins no servisu sira ba sidadaun sira, liuliu ba sira ne’ebé hela iha área sira izolada liu iha rai-laran, nune’e kumpre objetivu ida husi obejtivu hirak ne’ebé prevee ona iha Programa Governu Konstitusionál VI nian.
2. Dekretu-Lei kona-ba Estatutu Estatutu Prezidente Autoridade Munisipál sira no Administradór Munispál sira nian
Prosesu reorganizasaun Administrasaun Lokál Estadu nian sei ezije ba dirijente lokál sira preparasaun, responsabilidade, rigór no ezijénsia ne’ebé maka’as liután. Dekretu ida ne’e mai armoniza kuadru jurídiku kona-ba deskonsentrasaun territoriál, hodi konfere estatutu remuneratóriu no profisionál ida rasik ba Administrdór Munisípiu nian sira no mós ba Prezidente Autoridade Munisípiu nian sira, tuir responsabilidade hirak ne’ebé sira sei simu.
Konsellu Ministru analiza mós, programa kona-ba vizita Prezidente Repúblika Indonézia nian, Joko Widodo, mai Timor-Leste, iha loron 25 no 26 fulan-janeiru mai ne’e. Halo ona revizaun ba aspetu barabarak, liuliu kona-ba relasaun bilaterál no situasaun sira seguransa nian. Ba ida ne’e, Ministru Negósiu Estranjeiru no Kooperasaun informa kona-ba akordu sira ne’ebé mak atu estabelese entre nasaun rua durante vizita ofisiál ne’e. Iha sorin seluk, Ministru Interiór fó hatene ba Governu kona-ba planu seguransa interna ne’ebé prevee ona ba loron rua ne’e.
Ida ne’e hanesan vizita dahuluk Prezidente Joko Widodo nian mai Timor-Leste iha sekuénsia husivizita Primeiru-Ministru Rui Maria Araújo nian, ba Indonézia, ne’ebé halo iha fulan-agostu tinan liubá.
