Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 15 fulan-janeiru tinan 2016

Solidariedade ho Indonézia

Tuir atake koordenadu sira horisehik (loron 14 fulan-janeiru) iha Sentru Jakarta nian, Governu Timor-Leste hato’o ninia solidariedade ba Governu no povu Indonézia nian.

Governu Timor-Leste konsidera katak atake hirak ne’e núdar lala’ok krime violénsia nian ne’ebé labele aseita no hato’o ninia kondolénsias ne’ebé kle’an ba família no maluk vítima sira.

Governu Timor-Leste fó apoiu tomak ba deklarasaun Prezidente indonézia nian, Joko Widodo, bainhira afirma: “ami nia nasaun no ami nia povu labele ta’uk, ami sei la lakon tanba terrorizmu nia lala’ok hirak ne’e”.

Portavóz Governu Konstitusional VI, Ministru Estadu Agio Pereira haree katak “ita iha nafatin espíritu solidariedade no amizade ho governu no povu viziñu sira iha momentu difisil ne’e, atake hirak ne’e labele simu iha ita nia rejiaun. Ita tenke hahi servisu sira seguransa no emerjénsi nian, tanba hatan lalais no di’ak ba situasaun difisil ida ne’e”.