GOVERNU KONSTITUSIONÁL IV

SEKRETARIA ESTADU KONSELLU MINISTRU

KOMUNIKADU IMPRENSA

Soru-mutu Konsellu Ministru iha loron 10 fulan Fevereiru tinan 2010

Konsellu Ministru hala’o soru-mutu iha loron Kuarta ne’e, loron 10 fulan Fevereiru tinan 2010, iha sala Soru-mutu Konsellu Ministru nian, iha Dili , no halo aprovasaun ba:

1. 1. Rezolusaun ne’ebé kria Grupu Traballu ida atu Implementa Sistema Seguransa Sosiál ida.

Direitu timor-oan hotu-hotu nian ba seguransa sosiál, no obrigasaun Estadu nian atu promove organizasaun sistema sosiál ida, prevee iha artigu 56.^o Lei-inan nian.

Haree ba obrigasaun konstitusionál ida ne’e, no nesesidade atu tau hamutuk enerjia iha estudu kona-ba variavel sira kona-ba implementasaun  sistema ida ne’e nian, ohin Governu halo aprovasaun ba Rezolusaun ida ne’ebé kria grupu interministeriál ida, ne’ebé Ministériu Solidariedade Sosiál mak lidera, atu promove estudu hirak ne’ebé nesesáriu.

Grupu Traballu ne’e, integra mós reprezentante sira husi Ministériu Defeza no Seguransa, Ministériu Finansa, Ministériu Saude, Ministériu Administrasaun Estatál no Ordenamentnu Territóriu, Sekretaria Estadu Formasaun Profisionál no Empregu no husi Komisaun Funsaun Públika.

Ekipa ne’e iha ninia funsaun Espesiál rua: ida uluk mak define  rejime tranzitóriu ida kona-ba reforma ba traballadór hotu-hotu Estadu nian ne’ebé to’o ona idade reforma nian, tuir fali mak, forma ideia ida kona-ba modelu sistema seguransa sosiál nian ida ne’ebé atu adota iha Timor-Leste.

Ho razaun ida ne’e, Grupu Traballu ne’e tenke estuda hamutuk no aprezenta ba Governu proposta ida, ne’ebé inklui determinasaun kona-ba universu entidade kontributiva sira no tratamentu ne’ebé bele mosu seluk husi sira ne’e, determinasaun taxa kontributiva, determinasaun benefisiáriu no benefísiu hirak ne’ebé atu fó, hanesan mós, entre sira ne’e, prestasaun sosiál hirak ne’ebé ohin loron iha ka tenke agrega iha sistema no hirak ne’ebé mak tenke mantein no âmbitou prestasaun asisténsia sosiál nian.

Ho aprovasaun Rezolusaun ida ne’e, Governu promove, pasu uluk ida kona-ba atu tau iha prátika imperativu konstitusionál hodi garanti seguransa traballadór timor oan siran nian hafoin hala’o knaar iha sira nia moris ne’ebé sira dedika ba dezenvolvimentu Nasaun nian.

2. Rezulusaun ne’ebé Promove Enseramentu Programa “Hamutuk Hari’i Uma”

Programa “Hamutuk Hari’i Uma” kria ho objetivu atu fó opsaun oioin ne’ebé bele posibilita dezlokadu sira hodi bele no hela fila-fali ho respeitu ba sira nia direitu no dignidade.

Ho ida ne’e, koloka ona ba ema sira ne’ebé rejista ona iha programa laran, opsaun oioin hanesan atribuisaun pakote rekuperasaun nian, disponobilizaun hela-fatin tranzitóriu, no apoiu durante fila hikas ba uma.

Família hamutuk 17.287 mak rejista iha programa ne’e, no família hamutuk 17.000 mak fila ona ba sira nia hela fatin uluk, nune’e sei iha família balun mak hein hela tulun husi Estadu.

Nune’e mak ohin Governu rezolve taka programa ne’e, sei kontinua rezolve kazu hirak ne’ebé sei falta hela, to’o loron 31 fulan Maiu tinan ida ne’e nian.

Ba kazu hirak ne’ebé pendente hela, família sira tenke aprezenta dokumentasaun no informasaun ne’ebé falta hela, to’o loron 28 fulan Fevereiru, tanba ne’e, liu tiha data ida ne’e sei la simu tan informasaun adisionál sira.

Desizaun kona-ba situasaun pendente hirak ne’e sei desidi to’o loron 16 fulan Marsu oin mai no rezultadu sei taka iha edifisiu Ministériu Solidaridade Sosiál nian.

kona-ba família hirak ne’ebé  rejista  tiha ona  iha programa ne’e maibe  sei  hela nafatin iha  hela-fatin  tranzitóriu,  to’o  loron  28  fulan Fevereiru   tenki  husik hela ona  fatin ne’e,  bainhira simu ona  “pakote  rekuperasaun “ ne’ebé refere.

Iha loron  1  fulan Marsu,   imóvel ne’ebé  mak  sei  instala  iha  hela-fatin  provizóriu  sei  haruka fila-fali  ba  Direksaun  Nasionál  Tera  no  Propriedade,  Ministériu  Justisa nian.

3. Dekretu  ne’ebé  kria  Komisaun  Verifikasaun  Dadus   husi  períodu  Primeiru  Rejistu  ba Kombatente  Libertasaun Nasionál.

Hodi kumpri  buat ne’ebé   determina  tiha  ona  iha  artigu  3.° husi  Lei  9/2009, loron 29  fulan  Jullu,  ne’ebé  altera  Estatutu  Kombatente  Libertasaun  Nasionál,  Governu  aprova  dekretu  ida  ne’ebé kria  Komisaun   ida,  ne’ebé   sei  simu,  hanesan misaun, verifika  no  halo  validasaun  ba  dadus  kona-ba  rejistu  ba  Kombatente  Libertasaun  Nasionál  ne’ebé hahuu  iha  fulan  Setembru  tinan  2002.

Entretantu  Governu  hahuu,  iha  fulan  Maiu  tinan  2009,  períodu  foun  ida  ba  rejistu  Kombatentes   ne’ebé  nesesáriu  atu garante  kredibilidade  husi  dadus  husi  rejistu  ida  uluk, hodi  evita  duplikasaun  rejistu, buat  ne’ebé  mak  posível  bainhira  dadus  rejistu inisiál  verifikadu  no  konfirmadu  hotu  ona  to’o  ramata  segundu  periodu  husi  rejistu  ne’ebé  mak oras  ne’e  daudaun  hala’o  hela.

Komisaun  ne’e  sei  kompostu  husi  ekipa  sentrál   ida  ne’ebé  mak  sei  funsiona  hanesan  koordenadór-jeral  servisu  nian,  no  sei  deside verifikasaun  final      ba  kada  prosesu;  nu’udar par husi  ida  ne’e  sei  ezisti  tan  ekipa  rejionál  lima  ne’ebé  sei  dezenvolve  nia  servisu  verifikasaun  dadus   hamutuk  iha  baze  sira,  iha  nível  distritu  no  suku  sira. Sei  eziste  mós  ekipa  ida  seluk,  ne’ebé  responsabiliza  ba  verifikasaun  dadus  kona-ba   membru   organizasaun   juventude   nian,  ne’ebé  mak  sei atua  ho forma  transversal   ida  hamutuk  ho  ekipa   sira  seluk.